TikTok ınterfeısine qazaq tilin engizý jáne qazaqsha kontentti birlese damytý usynyldy.
Jýyrda Qazaqstanda TikTok-tyń ofısi ashylady. Bul týraly Aqparat jáne qoǵamdyq damý mınıstri Darhan Qydyráli feısbýktegi paraqshasynda jazdy, dep habarlaıdy Almaty-akshamy.kz.
Áleýmettik jelide mınıstr TikTok kompanıasynyń vıse-prezıdenti Teo Bertrammen kezdeskenin habarlady.
«Kezdesýde TikTok ınterfeısine qazaq tilin engizý jáne qazaqsha kontentti birlese damytýdy usyndym. Kompanıa ókili jelige qazaq tilin ornatý jaıy qarastyrylyp jatqanyn jetkizdi. Mınıstrlik aqparat, jastar, otbasy jáne azamattyq qoǵamdy damytý boıynsha ýákiletti organ bolǵandyqtan, kompanıamen kreatıvti kontentter jáne zamanaýı sapaly materıaldar jasaýǵa múddeli. Máselen, jelide Bala house, «El birligi» jobalary jaqsy kórilip jatyr. Bul baǵyttaǵy jobalardy birge jalǵastyryp, TikTok haýstardy uıymdastyramyz. Sebebi kompanıa jelide bilim berýge qatysty, ımıjdik kontentterdi kóbeıtýdi de josparlap otyr eken»,- dep jazdy mınıstr.
Darhan Qydyráliniń habarlaýynsha, Teo Bertramdy jýyrda ótetin Astana Media Week aptalyǵyna shaqyrǵan. Al mártebeli meıman aýqymdy is-sharaǵa qatysýǵa yntaly ekenin bildirgen.
«Taǵy bir jańalyq, jýyrda Qazaqstanda TikTok-tyń ofısi ashylady. Bul Qazaqstannyń belgili kompanıamen tyǵyz baılanys ornatyp, elge qajetti dúnıelerdi aqyldasa otyryp jasaýǵa taptyrmas múmkindik dep oılaımyn.Astanada ótken Digital Bridge forýmynda Memleket basshysy Qazaqstannyń aldynda sıfrlyq transformasıanyń basymdyqtaryn jarıalaǵany belgili. Atalǵan kezdesýler Prezıdent qoıǵan mindetterdi sapaly oryndaýǵa múmkindik beredi dep senemin», - dep jazdy mınıstr.