2022 jylǵy Beıjiń Olımpıadasyna qatysatyn Qazaqstan quramasynyń olımpıadalyq ekıpırovkasyn daıyndaýǵa bir jyldan asa ýaqyt ketti.
Ulttyq Olımpıadalyq komıtettiń dereginshe, formanyń tanystyrylymy osy aptada ótedi, dep habarlaıdy Almaty-akshamy.kz
Usynystar men keńesterdi jınaqtaý 2021 jyldyń basynda júzege asa bastady. Proseske eń basty qatysýshylardyń biri – sportshylardyń ózderi bolatyn. Olar sporttyq ekıpırovkanyń dızaıny, sapasy men fýnksıonaly týraly óz usynystaryn aıtty.
Qazaqstan Ulttyq Olımpıadalyq komıteti kóptegen suraqtardy sheshý barysynda atletterdiń pikirine qulaq asatynyn taǵy da dáleldedi. Bul joly dızaındy tańdaý jáne olımpıadalyq formanyń jıyntyǵyn daıyndaýda sportshylardyń usynystary nazarǵa alyndy.
«Birinshi kezekte qoldanýǵa jeńil bolǵany qajet. Árıne, komandamyzdyń stıldi bolǵanyn da qalaımyz. Biz úshin sapa men jaılylyq ta mańyzdy. Osy oraıda, kıimniń jyly bolǵanyn da eskerý kerek», - dedi short-trekten Qazaqstan komandasynyń kóshbasshysy Abzal Ájiǵalıev.
«Osydan bir jyl buryn, Almatydaǵy álem kýbogi aıaqtalǵan soń, bizge sporttyq formanyń túrli nusqalary men dızaınyn kórsetti. Kishigirim detaldar men túsin tańdaýǵa qatysty da bizdiń pikirimiz ben tilegimizdi surady. Olımpıadalyq ekıpırovka árbir atlet úshin óte mańyzdy. Óıtkeni, oıyn kezinde bizdiń qaı komandaǵa tıesili ekenimizdi dál osy sporttyq kıim arqyly anyqtaıdy. Eshkim kúndelikti kıimmen júrmeıdi, bárimiz de ulttyq qurama formasyn kıemiz. Jazǵy oıyndardaǵy forma barlyǵyna unady, qysqy Olımpıadanyń epıkırovkasy da kóńilden shyǵady dep oılaımyn. Ádemi bolatyny sózsiz», - dedi frıstaıl-akrobatıkadan Qazaqstan komandasynyń úzdigi Janbota Aldabergenova.