Bul týraly "Azamattarǵa arnalǵan úkimet" memlekettik korporasıasynyń resmı saıtynda habarlandy.
Mamandandyrylǵan halyqqa qyzmet kórsetý ortalyǵynda ótkiziletin teorıalyq jáne tájirıbelik emtıhanǵa endi tek "HQKO" qosymshasy arqyly ǵana jazylýǵa bolady, dep habarlaıdy aqshamnews.kz
Memlekettik korporasıa ókilderi bul jańashyldyq azamattarǵa yńǵaıy bolý úshin jáne sybaılas jemqorlyq táýekelderin azaıtýǵa baǵyttalǵanyn aıtady. "Qaýipsizdikti qamtamasyz etý maqsatynda "HQKO" qosymshasynyń barlyq qoldanýshysy eki faktorly aýtentıfıkasıadan ótedi: aldymen – bıometrıalyq ıdentıfıkasıa, sosyn 1414 nómirinen kelip túsken SMS-kody arqyly óziniń jeke basyn rastaıdy. Odan keıin júrgizýshi kýáligine úmitker "Teorıalyq emtıhanǵa jazylý" nemese "Tájirıbelik emtıhanǵa jazylý" batyrmasyn tańdaıdy. Budan soń qyzmet alýshyǵa 1414 nómirinen habarlama kelip túsedi.
Aıta ketý kerek, SMS habarlama Mobıldi azamattar bazasyna tirkelgen telefon nómirine jiberiledi. Qosymsha arqyly emtıhanǵa jazylý úshin aldyn ala mamandandyrylǵan halyqqa qyzmet kórsetý ortalyǵyna júginip, ótinim nómirin alý qajet ekenin eskertemiz", - delingen habarlamada. Bul servıs emtıhan ýaqyty men emtıhan tapsyrý kestesindegi ózgerister týraly paıdalanýshylarǵa habarlap otyrady. Bul aqparatty yńǵaıly túrde jáne der kezinde alý múmkindigin edáýir arttyrady.
Eske sala keteıik, emtıhanǵa jazylý buryn booking.gov4c.kz saıtynda júzege asyrylatyn, alaıda "HQKO" mobıldi qosymshasy arqyly qyzmetti keńeıtilgen aýqymda alý úshin saıttaǵy brondaý fýnksıasy óshiriledi. Dese de saıt paıdalanýshylarǵa emtıhan tapsyrý sátiniń translásıasyn onlaın rejımde kórsetý úshin óz jumysyn jalǵastyra beredi. Atalǵan qosymsha HQKO-ǵa barý ýaqytyn brondaýǵa, elektrondy kezek úshin talon alýǵa, qyzyqtyrǵan halyqqa qyzmet kórsetý ortalyǵynyń ornalasqan mekenjaıyn tabý jáne ózekti suraqtarmen tanysýǵa múmkindik beredi. "HQKO" qosymshasyn Google Play jáne App Store arqyly jazyp alýǵa bolady.