Qazaqstannyń Energetıka mınıstrligi benzın men dızel otynynyń shekti baǵalaryn alyp tastaý múmkindigin qarastyrýda. Bul sheshim janarmaı baǵasyn naryqtyq úlgige kóshirý qajettiligimen baılanysty. Mınıstrliktiń pikirinshe, mundaı qadam otyn tapshylyǵyn joıýǵa, salany jańǵyrtýǵa jáne uzaq merzimdi ınvestısıalar tartýǵa múmkindik beredi.
Búginde Qazaqstanda janarmaı baǵasy óńirdegi eń tómen deńgeıde saqtalyp otyr. Mysaly, AI-92 markaly benzınniń bir lıtri Qazaqstanda 205 teńge turady, al Reseıde – 288 teńge, Qyrǵyzstanda – 385 teńge, Ózbekstanda – 489 teńge. Dızel otynynyń quny da aıtarlyqtaı tómen: Qazaqstanda bir lıtri 295 teńge bolsa, kórshiles elderde 355-528 teńgege jetedi.
Energetıka mınıstrliginiń málimdeýinshe, osyndaı baǵa aıyrmashylyǵy janarmaıdyń zańsyz jolmen shekaradan shyǵarylýyna jáne otyn tapshylyǵyna ákelip otyr. Sonymen qatar bul munaı óńdeý zaýyttaryn jańǵyrtý úderisin tejeıdi.
«Qazaqstandaǵy janarmaı baǵasy álemdegi eń tómenderdiń biri bolyp qala beredi. Bul kórshi eldermen arada baǵa aıyrmashylyǵyn týdyryp, otyn tapshylyǵyna, salany jańǵyrtýdaǵy qıyndyqtarǵa jáne janarmaıdy zańsyz eksporttaýǵa sebep bolyp otyr», – dep atap ótti mınıstrlik ókilderi.
Usynylyp otyrǵan saıasat suranys pen usynys arasyndaǵy naryqtyq tepe-teńdikti qamtamasyz etýge, otyn tapshylyǵyn boldyrmaýǵa, jańa jumys oryndaryn ashýǵa jáne uzaq merzimdi ınvestısıalardy tartýǵa baǵyttalǵan.
Mınıstrlik ózgeristerdi birden emes, kezeń-kezeńimen engizýdi, sondaı-aq áleýmettik qoldaýdy eskerýdi josparlap otyr. Atap aıtqanda, aýyl sharýashylyǵy óndirýshilerine dızel otynyna jeńildetilgen jáne ashyq qoljetimdilikti qamtamasyz etý ýáde etilýde.
Sonymen qatar azamattarǵa qoldaý kórsetý sharalary saqtalady dep málimdeldi.