Ómirdiń ózi
Marına ekeýmiz bir palatada jattyq. Ol on segizde edi. Ekeýmiz bir ýaqytta bosandyq. Men de qyz týdym, ekinshi perzentim. Bosanǵanymyzǵa ekinshi kún.
– Sveta, Anútkama qaraı turyńyzshy, maǵan tómende ájem kelip tur edi, – dedi Marına.
– Jaraıdy, – dedim men kúlimsirep. Ol ájesine asyǵa júgirip ketti. Jas ananyń janary baqyttan jarqyrap turdy. Ol jańa týǵan qyzyn shópildetip súıe beretin, «kúnim» dep meıirlene ketetin. Marınaǵa jigiti telefon soqqanǵa deıin osylaı bolǵan.
– Marına, men saǵan uzaq ýaqyt aıta almadym.., seniń aıaǵyń aýyr bolǵandyqtan eshteńe aıtqym kelmedi, seni renjitip alýdan qoryqtym... Endi men sheshtim.., – dedi telefonnyń arǵy jaǵyndaǵy daýys.
– Egor, ne boldy? – dep surady Marına daýysyna qorqynysh sezimi aralasyp.
– Biz ajyrasýymyz kerek. Osydan úsh aı buryn men basqa adamdy jaqsy kórip qaldym...
– Egor! Bul qalaı, ne dep tursyń? Bizdiń qyzymyz bar ǵoı, al úılený toıymyz she? Jaqynda bizde otbasy bolady dep ýáde berip ediń ǵoı? – dep qyz ebil-sebili shyǵyp jylap ketti.
– Men seniń kóńilińdi túsirgim kelmep edi…
Telefon qońyraýy úzildi. Onymen birge Marınanyń baqyty da úzildi. Qyz jarty kún boıy tóbege qarap jatty da qoıdy. Sábıine áreń buryldy. Biraz ýaqyttan keıin anasyna qońyraý shalyp, kelýin ótindi. Bir saǵattan keıin Marına anasymen júzdesýge tómenge túsip ketti. Al qyryq mınýttan keıin ol palataǵa qaıtyp kelip, menedjerdi shaqyrýdy talap etti.
– Natalá Sergeevna, men qyzymnan bas tartamyn! – dedi Marına qatqyl únmen. – Meniń Anútkany baǵatyn jerim joq! Solaı. Jigitim bizden bas tartty. Bizde anam, ógeı ákem jáne men turatyn bir bólmeli páter bar. Al onda balaǵa oryn joq.
– Marına, sen ómir boıy osy isińe ókinesiń. Bul oıynshyq emes, – degen Natalá Sergeevna jas bosanǵan anany qalaıda raıynan qaıtarýǵa tyrysyp baqty.
– Men bárin sheshtim. Men jalǵyzilikti ana bolmaımyn! Meniń ómirim endi bastaldy! Balany myna jerden tezirek alyp ketińiz jáne óz erkimmen bas tartqanym týraly qol qoıyp beremin, tezirek ákelińiz qaǵazyńyzdy! – dedi Marına qatqyldaý únmen.
Natalá Sergeevnamen birge basqa dárigerler de qyzben birneshe ret sóılesýge tyrysty. Biraq qyz alǵan betinen qaıtpady. Marınanyń anasy da nemeresine tar páterde oryn joq ekenin, baǵa almaıtyndaryn aıtty.
Marına perzenthanadan shyǵyp ketken kúni ertesine ájesi kelip, oǵan shóberesin berýdi talap etti.
– Varvara Semenovna, ókinishke qaraı, zań boıynsha biz sizge balany bere almaımyz. Sizdiń jasyńyz bala baǵýǵa kelmeıdi, – dep túsindirdi dárigerler.
Iá, Varvara Semenovna kishkentaı Anútkaǵa nemquraıly qaramaıtyn jalǵyz meıirimdi adam bolyp shyqty. Ol qyzy men nemeresine neshe kún boıyna júgirdi, jalyndy, kishkentaı qorǵansyz shóberesin munda qaldyrmaýdy ótinip kemseńdep jylaı berdi. Biraq óz qyzy da, nemeresi Marına da kónbedi, ıilmedi.
– Mama, sen qanshada ekenińdi bilesiń be ózi? Bir aıaǵyń jerde, bir aıaǵyń kórde tur, al biz qalaı baǵamyz? Tamaǵymyzdy áreń taýyp otyrǵanda! – dep shıryqty qyzy.
– Men senderge kishkentaı bólmemdi bereıin, sony satyp, páterlerińdi keńeıtip alyńdar, – dedi Varvara Semenovna jylamsyrap.
– Al sonda óziń qaıda turasyń? – dedi Marına anasymen birge jarysa.
– Maǵan turatyn jer tabylar. Qarttar úıine bararmyn. Tek Anány tastamańdarshy!
– Mama, aqymaq bolýdy doǵar. Seniń úıiń báribir keıin bizge qalady emes pe. Al balany qajet dep tapsań óziń ala ber, – dedi Marınanyń anasy Svetlana qatqyl únmen.
Varvara Semenovna perzenthananyń aldynan ketpeı qoıdy. Dárigerlermen kelisimge kelýden úmittendi. Biraq esh nátıje bolmady. Perzenthanaǵa kelip turǵan kúıeýime medbıkeden estip júrgen osy áńgimelerimdi aıtyp berdim.
– Sasha, Anútkany biz asyrap alsaq qalaı qaraısyń? Ulymyzben, qyzymyzben qatar ósedi. Ony jaqsy kóretin ájesi bar, sol kisi kelip turatyn bolady, sóıtip nárestege de, ájeıge de qýanysh syılaımyz. Biz ony týǵan balalarymyzdan kem kórmes edik, – dedim qıylyp.
Osylaısha bizdiń otbasymyzda úsh bala boldy: úlkenimiz Maksım jáne Masha men Aná. Úıimiz shattyqqa toldy. Taǵy bir baqyt – bizdiń úıde endi áje bar. Ol kisi óz shóberesi Anány ǵana emes, bizdiń eki balamyzdy da óziniń týysyndaı qabyldady. Júregi sonshalyqty keń eken. Ol óz otbasymen baılanysyn úzdi.
Biz jan sany kóbeıdi ǵoı dep páterimizdi satyp, jer úı satyp almaq bolǵanymyzda Varvara Semenovna da óziniń qýyqtaı bólmesin satyp, aqshasyn bizge qosty. Qazir bárimiz birge turyp jatyrmyz. Bizden baqytty adamdar joq qazir. Sebebi, biz eki keremet adamdy janymyzǵa aldyq. Bizdiń Anútka men Vará ájeı!
Biz Marına men onyń anasy týraly eshqashan áńgime qozǵamaımyz. Olarǵa Qudaı tóreshi.