2025 jyl – Jumysshy mamandyqtar jyly aıasynda Almaty qurylys-tehnıkalyq kolejinde baspasóz týry uıymdastyryldy. İs-shara barysynda qonaqtar oqý ornynyń materıaldyq-tehnıkalyq bazasymen tanysyp, stýdentterdiń tájirıbeden qalaı ótetinin óz kózderimen kórdi. Kolejde búginde 41 oqý kabıneti, sport jáne akt zaly, jataqhana men úlken kitaphana jumys isteıdi. Eń bastysy – oqý prosesine qajet toǵyz sheberhana men zerthana stýdentterdiń erkin bilim alýyna jaǵdaı jasap otyr. Zamanaýı qurylǵylar ornatylǵan zerthanalarda jastar tek teorıany ǵana emes, naqty tájirıbeni meńgeredi.
Osyǵan baılanysty kolej dırektory Bekturǵan Ahmetov oqý ornynyń artyqshylyqtaryna toqtaldy:
«Bizdiń kolej 1969 jyly qurylǵan. Qazirgi tańda 8 mamandyq boıynsha 1200-den astam stýdent bilim alýda. Jyl saıyn jumysshy mamandyqtaryna qyzyǵýshylyq artyp keledi. Bıyl stýdentter sany byltyrǵydan 50-ge kóp. Biz Almatyda santehnıka jáne jylý júıesi boıynsha biregeı mamandar daıyndaımyz. Jaqynda “Haýs-master” mamandyǵyn ashtyq. Bul mamandyq santehnık, elektrık, dánekerleýshi qyzmetterin biriktiredi. Stýdentterimiz halyqaralyq jarystarda el namysyn qorǵap júr», – dedi ol.
Kolej dástúrli bilim berýmen shektelmeıdi. Munda stýdentterdiń kásipkerlik daǵdysyn qalyptastyrý úshin «Business Startup» ortalyǵy jumys isteıdi. Sondaı-aq, «Dánekerleý isi» baǵyty eýropalyq standarttarǵa sáıkes baǵalanyp, joǵary deńgeıde moıyndalǵan. Munyń bári jastardyń básekege qabiletti bolýyna yqpal etedi.
Osy múmkindikterdi paıdalanyp júrgen stýdentterdiń biri – santehnıka mamandyǵyn meńgerip júrgen Dmıtrıı Klımov. Ol óziniń tańdaýy men jetistikteri týraly aıtty:
«Bul sala árqashan qajet. Chempıonattarda baq synap, birinshi oryn alǵanym bar. Qazir halyqaralyq deńgeıde óner kórsetýge daıyndalyp júrmin. Kolej maǵan úlken múmkindik berdi, muǵalimderimiz kóp nársege úıretti. Bolashaqta óz kompanıamdy ashyp, elge paıdaly kásipker bolǵym keledi», – dedi jas maman.
Jastardyń jetistigi tájirıbeli ustazdardyń eńbegimen tyǵyz baılanysty. Oqytýshylar stýdentterdi birinshi kýrstan bastap, syzba syzýǵa, qurylys materıaldaryn tanýǵa, keıinnen shynaıy sheberhanalarda eńbek etýge baýlıdy. Sabaq barysynda jastardyń qatelikterin túzetip, baǵyt-baǵdar berip otyrady. Ýaqyt óte olar derbes jumys isteı bastaıdy, bul bolashaq mamandardyń kásibı biligin arttyrady.
Osy jaıynda oqytýshy Janar Qarataeva pikir bildirdi:
«Biz stýdentterdi qarapaıym syzbadan bastap, kúrdeli qurylys jumystaryna deıin úıretemiz. Alǵashqy kúnderi baqylap qana júrse, ýaqyt óte ózderi erkin jumys isteı bastaıdy. Qazirgi jastar mamandyqty júrek qalaýymen tańdap jatyr. Prezıdentimiz aıtqandaı, jumysshy kadrlar qoǵamnyń tiregi bolýy tıis», – dedi ol.
Kolejdiń eń úlken artyqshylyqtarynyń biri – dýaldi oqytý júıesi. Iaǵnı stýdentter tek teorıalyq bilimmen shektelmeı, seriktes kásiporyndarda óndiristik tájirıbeden ótedi. Bul tájirıbe jıhaz fabrıkalarynan bastap IT-kompanıalarǵa deıin qamtıdy. Mundaı ádis jas mamandardyń kásibı turǵyda jetilýine, bolashaqta jumysqa tez beıimdelýine múmkindik beredi.
Master Almas Qurnıazov ta sheberhanalardyń jumysyn tanystyryp ótti:
«Bizdiń sheberhanalar zamanaýı qurylǵylarmen jabdyqtalǵan. Metal óńdeý, dánekerleý jáne qurylys jumystarynda stýdentter halyqaralyq deńgeıde daıyndalady. Byltyr shákirtimiz Fransıada ótken WorldSkills chempıonatynda júlde aldy. Bıyl taǵy birneshe stýdentimiz shetelge joldama alyp otyr», – dedi ol.
Almaty qurylys-tehnıkalyq koleji búginde bilim, tájirıbe jáne halyqaralyq baılanystardy úılestire otyryp, eńbek naryǵyna suranysqa ıe bilikti kadrlar daıarlap keledi.