Tamyz tosyn minez tanytty
3 tamyz kúni Grýzıadaǵy Sunset showee qonaq úıiniń janynda kóshkin boldy. Balshyq massasynyń kólemi 5 mıllıon tekshe metrden asqan. Kóshkin ózen arnasynda demalyp jatqan týrısermen birge kotejderdi basyp qalǵan. Osyǵan baılanysty Grýzıanyń ishki ister mınıstrliginiń (İİM) saıtynda málimdeme jasady.
«Qazirgi ýaqytta qutqarýshylar 17 máıitti tapty. Qutqarý operasıasy aıasynda 200-den astam adam qaýipsiz jerge kóshirildi», - delingen habarlamada.
Al Grýzıa Densaýlyq saqtaý mınıstrliginiń málimdemesine sáıkes, apat aımaǵynan tabylǵan 17 máıittiń 16-sy medısınalyq tekserýge jiberilgen. Olardyń jeteýi qazirdiń ózinde anyqtalǵan.
Apatqa baılanysty Grýzıada 7 tamyz aza tutý kúni dep jarıalandy.
Al Pákistannyń ońtústiginde poıyz relsten shyǵyp ketip, saldarynan 30 adam qaza tapqan. 60 adam túrli dene jaraqatyn alǵan. Temirjol qyzmetiniń jetekshisi Mahmýdýr Rehman Laho habarlaǵandaı, Ravalpındıge baratyn poıyzdyń on vagony relsten shyǵyp ketti, al keıbireýleri Pákistannyń Navabshah qalasynyń mańynda aýdarylyp, kóptegen jolaýshy qysylyp qaldy.
Sarapshylardyń pikirinshe, qutqarý jumystary kezinde qurban bolǵandar sany artýy múmkin.
Germanıanyń Roıtlıngen qalasynda burshaq jaýyp, kóshelerdi qar basty.
Kóshedegi qar men muzdy tazalaýǵa 250 jumysshy jumyldyrylǵan. Keıbir jerlerde qardyń qalyńdyǵy 30 sm jetken.
Al Qytaıǵa aldymen kúshi óte qatty daýyl soǵyp, artynan sý basty. Mine, kúni keshe aspan asty eliniń Shyǵys Shandýn provınsıasynyń Dedjoý qalalyq okrýginiń Pıngúan okrýginde 5,5 baldyq jer silkinisi 6 tamyzda Beıjiń ýaqyty boıynsha 2.33-te oryn aldy. Oshaq 10 myń metr tereńdikte bolǵan. Qytaıdyń Ortalyq teledıdary provınsıalyq tótenshe jaǵdaılardy basqarý pýnktiniń málimetine sáıkes ázirge 126 ǵımarat qırap, 20-dan astam adam zardap shekken. Shandýn provınsıasyndaǵy poıyzdardyń qozǵalysy ishinara toqtatyldy. Órt-qutqarý jasaqtary jer silkinisiniń epısentrine jiberilgen.
