Almatyda 11,2 myń jumys ornyn qamtıtyn jumyspen qamtý baǵdarlamalaryn qarjylandyrý 40%-ǵa ulǵaıdy
Almatyda Áleýmettik qyzmetter úıinde qala ákiminiń orynbasary Ásem Núsipovanyń, Qoǵamdyq keńes ókilderiniń, úkimettik emes uıymdar basshylarynyń qatysýymen jumyspen qamtý baǵdarlamalaryn iske asyrý máselesi boıynsha kezdesý ótti, dep habarlaıdy almaty-akshamy.kz
Almaty ákiminiń orynbasary osy jylǵa arnalǵan baǵdarlamalardy júzege asyrýdyń jańa tásilderin túsindirip, kezdesýge qatysýshylardyń suraqtaryna jaýap berdi.
Negizinen Jumyspen qamtý baǵdarlamalary boıynsha jumys berýshilerdiń tizbesin qalyptastyrý ólshemderine, erekshe qajettiligi bar jandardy jumysqa ornalastyrý úshin qosymsha jumys oryndaryn bólýge jáne jalaqyǵa bólinetin sýbsıdıalardyń mólsherine qatysty máseleler kóterildi.
«Bıyl jyl basynda Jumyspen qamtý baǵdarlamasyn iske asyrýǵa 12 mlrd. teńge qarjy bólindi, bul 2023 jyldyń sáıkes kezeńimen salystyrǵanda 40%-ǵa joǵary, sonyń arqasynda 11,2 myń jumys orny qurylady. Qala ákimdigi Jumyspen qamtýdyń birde-bir baǵdarlamasyn qysqartqan joq. Sonymen qatar, «Áleýmettik jumys orny» baǵdarlamasy boıynsha jumys oryndarynyń sany 380-den 500-ge deıin kóbeıtildi. «Qoǵamdyq jumystar» baǵdarlamasy boıynsha 30%-ǵa ulǵaıyp, 8.7 mlrd. teńge bólindi», - dedi Ásem Núsipova.
Almaty ákimi orynbasarynyń aıtýynsha, byltyr Jumyspen qamtý baǵdarlamasynyń búdjeti eki ret túzetilip, birneshe baǵyt boıynsha edáýir ulǵaıǵan, alaıda bul tájirıbeniń daýly tustary bar edi. Onyń aıtýynsha, bıyl da túzetýler bolýy múmkin, biraq bul qosymsha sýbsıdıalanatyn jumys oryndarynyń qajettiligin tereń taldaý nátıjesine baılanysty.
Jalpy, 2024 jylǵa arnalǵan jumys berýshilerdiń tizbesi jumys berýshiler bergen ótinimder men jergilikti atqarýshy organdardyń áleýmettik paıdaly kásipter boıynsha qajettiligi negizinde qalyptastyryldy. Ony bekitý kezinde jumys berýshilerdiń qatysý jıiligi, elektrondyq eńbek sharttaryn jasasý, jalaqy tóleý sharttary men merzimderin saqtaý sıaqty krıterııler eskerildi. Ashyqtyqty qamtamasyz etý úshin tizim Eńbek mobıldiligi ortalyǵynyń saıtynda (www.ctm-almaty.kz) jarıalanǵan.
«Sońǵy jyldardyń qorytyndysy boıynsha jumyspen qamtý baǵdarlamalaryn iske asyrýdy taldaý bir jumys berýshilerge sýbsıdıalar jıi beriletinin kórsetti. Sonymen qatar, jumyssyzdardyń tizimi ózgergen joq, sebebi olar ózderiniń biliktiligin arttyryp, turaqty jumys ornyna ornalasqysy kelmedi. Osyǵan oraı, Jumyspen qamtý jáne áleýmettik baǵdarlamalar basqarmasy sıfrlyq tehnologıalar arqyly baqylaý sharalaryn kúsheıtti», - dedi ákimniń orynbasary.
Onyń sózinshe, bul jaýapsyz jumys berýshilerdi anyqtaýǵa jáne jańa 2 myń uıymǵa baǵdarlamalarǵa qatysýǵa múmkindik berdi. Ári Jumyspen qamtý baǵdarlamalaryna qatysýshylar úshin «Skills Enbek» portalynda onlaın oqytý qarastyrylǵan, bul olardyń mansaptyq damýyn yntalandyrýǵa múmkindik beredi.
Áleýmettik paıdaly kásipter boıynsha barlyq menshik nysanyndaǵy jumys berýshiler úshin sýbsıdıalanatyn jumys oryndaryna ótinimder osy jyldyń qańtar aıynyń sońyna deıin qabyldanatynyn ataǵan jón.
Bul rette, Áleýmettik qyzmetter úıinde dúısenbi kúni saǵat 12.00-de Jumyspen qamtý jáne áleýmettik baǵdarlamalar basqarmasynyń, sonymen birge, Eńbek mobıldiligi ortalyǵynyń jaýapty laýazymdy adamdary barlyq normany túsindirý úshin ÚEU ókilderimen jáne jumys berýshilermen kezdesýler ótkizedi.