Ataqty skrıpkashy, Qazaqstannyń eńbek sińirgen qaıratkeri Jámılá Serkebaeva otbasylyq mereke – Jańa jyldy qalaı qarsy alatyny týraly aıtyp berdi.
– Ádettegideı, Jańa jyldy jaqyndarymmen jáne týǵan-týystarymmen birge dástúrli túrde ózime jaqyndardyń ortasynda sham jaryǵymen árlengen ádemi dastarqan basynda qarsy alýdy josparlap otyrmyn. Dástúrli jańa jyldyq shyrshany ulym jáne ákemmen birge bezendirdik. Shyrsha úıge erekshe jylýlyq syılaıdy, eresekter men balalar merekeni kútýdiń erekshe kóńil kúı syılaıdy, bul sezim jyldar ótse de ózgermeıdi, – deıdi Jámılá Serkebaeva.
Otbasylyq dástúr boıynsha, dastarqanda skrıpkashynyń ájesi men anasy daıyndaǵan taǵamdar mindetti túrde bolýy kerek, bul arqyly urpaqtan urpaqqa beriletin dástúrler saqtalady.
– Ádette, biz úlken dastarqan daıyndaımyz, negizgi ystyq taǵam retinde manty nemese alma qosylǵan qýyrylǵan úırek pisiremiz. Bizdiń dastarqanymyzda mindetti túrde qazaqtyń dástúrli taǵamdary, túrli dámder men táttiler bolady, – dep atap ótti bizdiń suhbattasýshymyz.
Serkebaeva otbasyndaǵy eń súıikti dástúrdiń biri – Jańa jylda jaqyndaryna, týǵan-týystaryna jáne dostaryna syılyq berý ekenin aıtty.
– Qazirdiń ózinde onnan astam syılyqtar salynǵan qapshyqtar bólmeni toltyryp tur. Bul bizge qazaqtyń syı jasaý jáne qonaqjaılylyq dástúrin eske salady. Ózim de syılyq jasaýdy jaqsy kóremin, maǵan eń qatty unaıtyny – syılyqty alǵan adamnyń shynaıy ári jarqyn emosıasyn kórý. Bul meni erekshe qýattandyrady, al syılyqty dál taýyp bergenimde qýanyshym eselene túsedi.
Bıyl ulymnyń Jańa jyldy menimen birge qarsy alýdy sheshkenine erekshe qýanyshtymyn. Kóptegen jasóspirimder belgili bir jasta dostarymen birge merekeni kóńildi ótkizýge umtylady, – dep mádenıet qaıratkeri bólisti.
Sondaı-aq, ol balalyq shaqtaǵy Jańa jyldy qarsy alý týraly estelikterimen bólisti:
– Ájemniń (ákemniń anasy) qaraqat qosylǵan bálishi erekshe dámdi bolatyn. Al eń jarqyn áser – Jańa jyl qarsańynda anamnyń ákesiniń kelýi. Sol ýaqytta qatty qar jaýyp turǵan edi, onyń shashy appaq, Aıaz ataǵa uqsaıtyn. Árdaıym úlken shyrshany alyp keletin, ústi-basyn qar basqan, paltosy da appaq bolatyn. Barlyǵy ertegideı kórinetin. Bul balalyq shaqtaǵy áser eshqashan umytylmaıdy.
Meni kóp erkeletpeıtin, sebebi ol kezde ata-anam qarapaıym ómir súrdi. Biraq, olar árdaıym meniń qalaýlarymdy oryndaýǵa tyrysty, – deıdi Jámılá Serkebaeva.
Jańa jyldyq tilekterin aıtqanda, ol beıbitshilik pen ózara túsinistikti, mádenıet pen dástúrlerdi qurmetteýdi erekshe atap ótti:
– Ár júrek meıirimge tolyp, ómir barshaǵa qýanysh pen baqyt syılasyn dep tileımin. Eń bastysy, biz barymyzdy baǵalap, ómirden lázzat alýymyz kerek. Barlyq adamdardyń baqytty bolýyn, dastarqandary jaınap, balalardyń kúlip-oınap, jetistikterimen qýantýlaryn qalaımyn. Bir-birimizge degen shynaıylyq pen mahabbat arta bersin, – dep túıindedi Jámılá Serkebaeva.