· 2024 jyl Almaty qalasynyń turǵyndary úshin damý men jańashyldyqtyń jarqyn kezeńi boldy. Qalada medısına, bilim berý, turǵyn úı jáne qoǵamdyq keńistikterdi damytý salalarynda aıtarlyqtaı jetistikterge qol jetkizildi. Turǵyndardyń pikiri medısınalyq qyzmetterdiń sapasynyń artýy, sıfrlyq tehnologıalardyń engizilýi, jastarǵa arnalǵan turǵyn úı baǵdarlamalary jáne qoǵamdyq oryndardyń jańǵyrtylýy sıaqty bastamalardyń tıimdiligin rastaıdy.
· Almaty turǵyndarynyń pikirleri – qalanyń damýyna berilgen baǵa ǵana emes, sondaı-aq, halyqtyń ıgiligi úshin jasalǵan jumystardyń tıimdiligin kórsetetin shynaıy aıǵaq. Bul oń ózgerister Almatyny jańa múmkindikter qalasy retinde tanytty.
Aıdana ASYLBEK, bolashaq dáriger: ALMATY MEDISINASYNYŃ MÚMKİNDİGİ JOǴARY
– Men ázirge stýdentpin. Biraq mamandyǵyma saı medısınadaǵy tyń jańalyqtarǵa qulaq túrip júremin. Medısınalyq qyzmetterdiń sapasyn arttyrý – áleýmettik turaqtylyqtyń kepili. Bıyl jazda elimizde alǵash ret "uryq hırýrgıasy" pılottyq jobasy engizildi. Bul, eger qursaqta jatqan sharananyń damýynda kinárat bolsa, sony emdeıtin jańa ınovasıa. Bul operasıa eń alǵash zamanaýı medısınalyq apparattarmen jabdyqtalǵan Almaty klınıkasynda jasaldy. Endi bizde jylyna 150-ge deıin jatyrishilik operasıa jasaýǵa bolatyn kórinedi. Bul degenińiz eń úlken ozyq jetistik!
Samal QALDYBEK, stýdent: KİTAPHANALAR 24/7 KÚN İSTEIDİ
– Qazir Almaty kitaphanalarynyń kúnimen, túnimen, ıaǵnı 24/7 qaǵıdatymen jumys isteıtini unaıdy. Kúndiz sabaqta, túrli ádebı-mádenı is-sharalarda bolamyz da, keshke kitaphanalarǵa barýǵa úlgermeı qalyp jatatynbyz. Qazir izdegenińniń bári ınternette tur, degenmen, kitaphananyń aýrasy bólek. Alatyn aqparatyń da senimdirek. Men, máselen, Jambyl atyndaǵy jasóspirimder kitaphanasyna jıi baramyn. İshi sondaı jaıly, jap-jaryq, eńseli. Tynysh qana otyryp kitap oqıtyn aımaǵy bólek. Al dostaryńmen áldebir taqyrypta pikirtalastyrý qajet bolsa, oǵan bólek aımaq arnalǵan. Eshkim eshkimge kedergi jasamaıdy. Tipti, kitaphanada kezdesip, tabysyp, shańyraq kóterip jatqan tanystarym bar. Bizge rýhanı baı urpaq kerek dep oılaımyn.
Gúlnur ÁBİLQASYMOVA, muǵalim: SIFRLYQ TEHNOLOGIALAR – BİLİM SAPASYN ARTTYRADY
– 2024 jyly qala mektepteri sıfrlyq platformalarmen tolyqtaı jabdyqtaldy. Bul muǵalimderdiń jumysyn aıtarlyqtaı jeńildetti. Endi kúndelikti sabaqtardy ınteraktıvti taqtalar arqyly ótkizemiz, elektrondyq kúndelik júıesi ata-analarmen baılanys ornatýǵa kómektesedi. Bilim berý prosesiniń sıfrlanýy oqýshylardyń bilim sapasyn arttyrýǵa úlesin qosyp, muǵalimderdiń ýaqytyn únemdeýge múmkindik beredi. Osyndaı jańashyldyqtar úshin alǵysymdy bildiremin.
Aqzer ORYNBASARQYZY, qala turǵyny: KÓPTEN KÚTKEN PÁTERİMİZDİ ALDYQ
– Bıyl bizdiń otbasymyz úshin erekshe jyl boldy.Kóptegen jaqsy jańalyqtarmen aıaqtalyp jatqan jyl bolyp tur.Eń qýantarlyǵy, turǵyn úı qurylysyna arnalǵan memlekettik baǵdarlamanyń arqasynda Almatydan kópten kútken páterimizdi aldyq. Memlekettik qoldaýdyń arqasynda jas mamandarǵa arnalǵan baǵdarlamanyń sharttary biz úshin óte qolaıly boldy. Bul tek baspana ǵana emes, sonymen birge otbasymyz úshin úlken jetistik. Osyndaı jobalar jastarǵa óz bolashaǵyn qalada qurýǵa úlken motıvasıa beredi. Buryn jaldamaly baspanada turyp, shyǵyndarymyz kóbeıip ketetin. Endi óz úıimizde turyp jatyrmyz, bul biz úshin úlken qýanysh. Qalanyń ár aýdanynda osyndaı qoljetimdi turǵyn úılerdiń salynyp jatqany óte jaqsy bastama dep oılaımyn. Bul kóptegen otbasylarǵa jaıly ómir súrý múmkindigin syılap otyr.
Ásel NURǴAZINA, Almaly aýdanynyń turǵyny: TAMASHA JOBA
– Biz úshin bıyl erekshe jyl joldy. Rozybakıev kóshesi men Dúısenov kósheleri qıylysy buryn jabaıy saýda men retsiz kólik turaǵynyń ordasy bolǵan edi. Qazir ol jerde «Shıpa Dent» degen ataýmen saıabaq paıda boldy. Bul saıabaqqa biz «Halyq qatysatyn búdjet» baǵdarlamasy arqyly qol jetkizdik. Azamattyq belsendilik pen jergilikti bılik júıesiniń tıimdiligin arttyratyn tamasha joba.
Jańa jyl jaqyndaǵan saıyn saıabaǵymyz burynǵydan da keremet bolyp ketti. Jalt-jult etken shamdar kóńil-kúıińdi kóteredi. Balalar da, biz de mázbiz. Óıtkeni, munda bos ýaqytyńdy ótkizý úshin barlyq jaǵdaı jasalǵan, jaıaý júrginshiler joly, balalar oınaıtyn alań, qolaıly oryndyqtar, tipti sýretke túsýge arnalǵan arnaıy aımaq ta bar. Halyq únin estip, ótinishimizge qulaq asqan qala bıligine, aýdan ákimdigine alǵys aıtamyz.
Altynaı ERKİNQYZY, M.Bazarbaev atyndaǵy №138 gımnazıanyń muǵalimi: JASTARǴA QAMQORLYQTY SEZİNDİM
– 2024 jyl men úshin erekshe jyl boldy – «Almaty jastary» baǵdarlamasy arqyly óz baspanamdy alyp, armanym oryndaldy. Osyndaı mańyzdy ári qoljetimdi múmkindikti usynǵany úshin memleketke, jaýapty mekemelerge jáne baǵdarlamany júzege asyrǵan barlyq mamandarǵa alǵysymdy bildiremin. Bul bastama jastarǵa úlken qoldaý kórsetip, óz bolashaǵyn senimdi túrde josparlaýǵa kómektesedi. Almaty – men úshin jańa bastamalar men múmkindikter qalasy. Endi óz úıimde jańa armandar men maqsattardy júzege asyrýǵa asyqpyn. Elimizde osyndaı ıgi ister kóbeıe bersin.
· TÚIİN: Almaty – árbir turǵynynyń ómirin jaqsartýǵa baǵyttalǵan qala. Bıylǵy jyly qol jetkizilgen jetistikter – bul tek qala basshylyǵynyń emes, azamattyq qoǵamnyń da belsendi úlesiniń nátıjesi. Medısına, bilim berý, turǵyn úı máseleleri jáne qoǵamdyq keńistikterdi jaqsartý boıynsha iske asyrylǵan jobalar qala turǵyndarynyń senimi men qoldaýyna ıe boldy. Bul ózgerister Almatynyń áleýmettik turaqtylyq pen ınovasıalardyń ortalyǵy retindegi mártebesin nyǵaıtyp, onyń bolashaqqa degen senimdi qadam jasap kele jatqanyn kórsetedi. Halyq ıgiligine baǵyttalǵan osyndaı bastamalar odan ári jalǵasyp, jańa bıikterdi baǵyndyrýǵa negiz bolmaq. Almaty – barshaǵa ortaq jetistikter men múmkindikter qalasy.