Kóptegen elde, sonyń ishinde Qazaqstanda da, júkti áıelderge koronavırýs juqtyrmaý úshin qatań oqshaýlaý rejımi usynylady. Alaıda elimizde bolashaq analar arasynda aýrý tirkelip jatyr. Almaty qalalyq №2 perzenthananyń bas dárigeri orynbasarynyń mindetin atqarýshy Nazgúl Imanǵalıeva COVID-19 áıeldiń densaýlyǵy men júktiligine qalaı áser etetini týraly aıtyp berdi, dep habarlaıdy almaty-akshamy.kz inform.kz silteme jasap.
Dárigerdiń aıtýynsha, koronavırýs ınfeksıasy - óte kúrdeli jáne kóptegen qıyndyǵy bar aýrý. «Júkti áıelder, barlyq adamdar sıaqty, koronavırýs juqtyrýy múmkin. Kóp jaǵdaıda bul ınfeksıa anaǵurlym aýyr ótedi. COVID-19 ókpege áser etedi, mıdyń gıpoksıalyq jaǵdaıy damıdy. Qan uıyp, asqynady. Júkti áıelder úshin ınfeksıa aıtarlyqtaı qaýipti, jatyrdaǵy nárestege de áser etýi múmkin»,- deıdi dáriger. Sonymen qatar, ol eger jótel paıda bolyp, dene qyzýy kóterilse, birden dárigerge qaralý kerektigin basa aıtty.
«Aýrýdyń jıi kezdesetin klınıkalyq kórinisteri - dene qyzýynyń kóterilýi, jótel, bulshyq etterdiń aýyrýy, álsizdik, qusý, júrek aınýy. Buǵan qosa, sharshaý, dıareıa, entigý jáne tamaq aýrýy jıi kezdesedi. Aýrýdyń klınıkalyq kórinisi JRVI-ge uqsas. Eger osyndaı belgiler paıda bolsa, birden "jedel járdem" shaqyryp, dárigerge qaralý qajet»,- deıdi Nazgúl Imanǵalıeva.
Spıkerdiń sózinshe, júkti áıelder barlyq saqtyq sharalaryn qatań saqtaýlary tıis.
«Aýrýdyń aldyn alý úshin jeke gıgıena erejelerin saqtaý kerek. Atap aıtar bolsam, qoldy jıi-jıi sabynmen jýý qajet. Maskany únemi taǵyp júrgen abzal. Adam kóp shoǵyrlanatyn jerlerden aýlaq bolyp, buqaralyq sharalardan bas tartý qajet. Júkti áıelder vırýstan ázirge tek osylaı ǵana qorǵana alady. Sebebi, bizde aıaǵy aýyr kelinshekterge vaksına salynbaıdy», - dep qorytyndylady sózin Almaty qalalyq № 2 perzenthana bas dárigeri orynbasarynyń mindetin atqarýshy Nazgúl Imanǵalıeva.