Ulttyq testileý ortalyǵy 2023-2024 oqý jylyna otandyq joǵary oqý oryndardaryna túsýge arnalǵan UBT-nyń shekti upaılaryn jarıalady.
Mınıstrliktiń shekti upaılary ózgergen joq, dep habarlaıdy Almaty-akshamy.kz.
Egemen.kz basymylynyń jazýynsha, «Quqyq» jáne «Pedagogıkalyq ǵylymdar» bilim berý salalary úshin keminde 75 bal, «Densaýlyq saqtaý jáne áleýmettik qamtamasyz etý (medısına)» baǵyty úshin keminde 70 bal, «Aýyl sharýashylyǵy jáne bıoresýrstar», «Veterınarıa» salalary úshin keminde 60 bal, ulttyq joǵary oqý oryndaryna túsý úshin keminde 65 bal, basqa joǵary oqý oryndaryna túsý úshin keminde 50 bal jınaý kerek. Ár pán boıynsha shekti bal – 5.
Sonymen qatar 2019 jyldan bastap akademıalyq erkindik sheńberinde joǵary oqý oryndary aqyly negizde de, grant boıynsha da oqýǵa qabyldaý úshin UBT-nyń óz shekti baldaryn belgileýge quqyly. Ulttyq testileý ortalyǵy jyl saıyn talapkerlerge yńǵaıly bolý maqsatynda elimizdiń barlyq joǵary oqý ornynyń shekti baldaryn ortaq tizimde usynady. Bul derekter oqý oryndarynyń veb-saıttarynda da qoljetimdi.
«Mysaly, bir túlek «Matematıka» pániniń muǵalimi bolǵysy keledi delik. Ol UBT-da jınaǵan 80 balymen grant konkýrsyna nemese Eýrazıa ulttyq ýnıversıtetiniń aqyly bólimine tapsyrǵysy keledi. Ózderińiz biletindeı, «Pedagogıkalyq ǵylymdarǵa» shekti bal keminde – 75 bal, al ulttyq joǵary oqý oryndaryna – keminde 65 bal. Túlektiń jınaǵan baly oqýǵa qabyldaý úshin jetip tur. Alaıda bul ýnıversıtettegi onyń oqyǵysy keletin mamandyqqa shekti bal 90-nan bastalady. Demek, túlekke 80-nen tómen shekti baldary bar basqa ýnıversıtetti izdeý kerek. Sondyqtan oqýǵa qujattardy tapsyrar aldynda talapkerler joǵary oqý oryndarynyń shekti baldaryn bilýge tıis», – deıdi Ulttyq testileý ortalyǵynyń dırektory Rýslan Emelbaev.
2023-2024 oqý jylyna arnalǵan memlekettik bilim berý tapsyrysy ornalastyrylatyn joǵary oqý oryndarynyń tizimi jaqyn ýaqytta jarıalanady.