Al ónerkásiptegi qaýipsizdik qaǵıdasy qaıta qaralyp, jóndeýge qatysty shekti tarıf bekitilmek.
Májilis otyrysynda depýtat Baýyrjan Smaǵulov osyndaı bastama kóterip, Úkimet basshysyna saýal joldady. Depýtattyń aıtýynsha, sonda ǵana jylýmen qamtýdaǵy problemany retteýge bolady. Jalpy 2021 jylmen salystyrǵanda 2022 jyly eldegi energetıkalyq kásiporyndarda apat sany 23 paıyzǵa kóbeıgen, dep habarlaıdy Almaty-akshamy.kz 24.kz-ke silteme jasap.
«Energetıkalyq kásiporyndarda júrgizilgen aýdıttiń qorytyndysy kóńil kónshitpeıdi. Bıylǵy birinshi qańtardaǵy jaǵdaı boıynsha jylý óndirý salasynda 37 energıa kózi jumys isteıdi. Olardyń qurylǵanyna 61 jyldan asqan. Tıisinshe materıaldyq jabdyǵy 66 prosentke tozyp tur. Keıbir qalalarda tipti 80 paıyzdan asady. Búginde Májiliste zań jobasy qaralyp jatyr. Bul qujat energetıka salasyndaǵy memlekettik baqylaýdy aıtarlyqtaı kúsheıtýdi kózdeıdi», - deıdi QR Parlamenti Májilisiniń depýtaty Baýyrjan Smaǵulov.