Nur Otan partıasynyń Almaty qalasy boıynsha ázirlegen Jol kartasy aıasynda 2025 jylǵa deıin 15 jańa mektep jáne 25 mekteptiń japsarlas qurylysy salynýy kerek. Sonyń bıyl qurylysy júrgizilip jatqan 8 mekteptiń jáne jumys istep turǵan 17 mekteptiń japsarlas qurylysy bastaldy, dep habarlaıdy almaty-akshamy.kz
Óńirlik Bilim jónindegi keńestiń otyrysynda 17 japsarlas qurylystyń 14-i qyrkúıek aıynda deıin berilse, qalǵany jyl aıaǵyna deıin tapsyrylatyny aıtyldy. Atalǵan japsarlas qurylystyń berilýinen 8 263 qosymsha oqýshy orny qurylady.
8 mekteptiń qurylysy boıynsha Almaty qalalyq jaıly orta basqarmasynyń basshysy S.Nurashevtyń aıtýynsha, pandemıaǵa, ekonomıkalyq daǵdarysqa jáne qurylys materıaldarynyń qymbattaýyna baılanysty qurylysy bıyl aıaqtalýy josparlanǵan 8 mekteptiń qurylysynyń aıaqtalmaý qaýpi bar. Osyǵan oraı, basqarma tarapynan smetalyq qujattar qaıta ázirlenip, qosymsha qarajat bólý týraly memlekettik organdarǵa arnaıy hat joldanǵan.
Keńes músheleri ár nysannyń qurylys barysyna jeke toqtalyp, bıylǵy jylǵa halyqqa bergen ýádeni oryndaýǵa tyrysý kerektigin eskertti. Sondaı-aq, smetalyq qujat pen qosymsha qarajat bólý máselesi boıynsha qoǵamdyq Keńes óz tarapynan fraksıa múshelerine, tıisti organdarǵa saýalnama joldaıtyndyǵyn atap ótti.
Sonymen qatar, bilim basqarmasy bıylǵy jyly 3 jekemenshik mektepterdiń iske qosylýy men 17 mekteptiń japsarlas nysandarynyń paıdalanýǵa beriletinine saı 10 myń qosymsha oqý oryndary paıdalanýǵa beriletinin aıtty.⠀
Otyrys barysynda keńes tóraǵasy Takır Balyqbaev búdjet qarajatynyń tıimdi jumsalýyna erekshe nazar aýdarýdy tıisti basqarma ókilderiniń qaperine saldy.
Osy negizde mektepterdiń ótinimi boıynsha, áleýmettik osal sanattaǵy balalardy qala syrtyndaǵy lagerlerde jazǵy demalyspen tegin qamtýǵa jergilikti búdjetten 270 mln.teńge bólindi. Josparlanǵan jalpy qamtý shamamen 3800 balany quraıtyny da aıtyldy.
Keńes otyrysyn qorytyndylaǵan Bolat Sadyqov jıyn barysynda mańyzdy máselelerdiń qaralǵanyn atap, aıtylǵan usynystardyń Bilim men ǵylymdy damytý jónindegi respýblıkalyq qoǵamdyq keńesine, qala máslıhaty janyndaǵy depýtattyq fraksıaǵa jáne memlekettik organdarǵa tıisti sheshim shyǵarý úshin joldanatynyn málimdedi.