Elordada “Qazaqstan Project Management Awards – 2023” ulttyq baıqaýynyń qorytyndysy shyǵaryldy.
Jol júrisi qaǵıdalaryn buzýshylardy avtomatty túrde anyqtaıtyn “Qorǵaý” júıesi jyldyń eń úzdik jobalarynyń biri bolyp tanyldy. Polısıa vedomstvosy saıystyń kúmis júldegeri atandy, dep habarlaıdy Almaty-akshamy.kz.
İİM aqparatyna saı, ıntellektýaldy baǵdarlama Sergek Group kompanıasynyń mamandarymen birge ázirlengen.
«Joba jol qozǵalysy qaýipsizdigin qamtamasyz etýge arnalǵan. Ol qolda bar resýrstar sheńberinde qysqa merzimde ázirlendi. Sondyqtan sapany arttyrý, maqsatqa jetý úshin biz jobalyq basqarýdy qoldanyp, búgingi nátıjege jettik. Birinshiden, apattyq kórsetkishter tómendedi, ekinshiden, biz patrúldik polıseılerge jol júrisi qaǵıdalaryn buzýshylardy tez arada anyqtap, olarǵa qatysty shara qoldanýǵa múmkindik beretin sıfrlyq qural jasadyq», – dedi İİM ákimshilik polısıa komıteti tóraǵasynyń orynbasary Serik Túsipov.
Baǵdarlama júrgizýshiler tártibin arttyrýǵa yqpal etip qana qoımaı, sonymen qatar jol-kólik oqıǵalarynyń aldyn alýǵa kómektesedi.