Bıyl 25 qazanda polısıa kúsheıtilgen rejımde jumys isteıdi. Bul kúni zańsyz mıtıń uıymdastyrýǵa jol bermeımiz. Bul týraly İshki ister mınıstriniń orynbasary Igor Lepeha aıtty, - dep habarlaıdy almaty-akshamy.kz Massaget.kz-ke silteme jasap.
Úkimettiń baspasóz ortalyǵynda BAQ ókili İİM ókiline suraq qoıdy.
"Áleýmettik jelide jolda ketip bara jatqan polısıa kólikteriniń vıdeosy tarady. Vıdeonyń avtorlary polısıa 25 qazanda bolatyn mıtıńke daıyndalyp jatqanyn aıtady. 25 qazanda polısıa kúsheıtilgen rejımde jumys isteı me? Siz bul vıdeony kórdińiz be? Áleýmettik jeli arqyly adamdardy mıtıńke shaqyrý zańdy ma? Mundaı áreketke barǵandar jaýapqa tartyla ma?", - dedi ol vıse-mınıstrge.
Igor Lepeha bul vıdeony kórmegenin aıtty.
"Bizde adamdar áskerı kolonna ketip bara jatsa, soǵys bastaldy, polısıa kolonnasy ketip bara jatsa, mıtıń shyqqandardy qýǵaly bara jatyr dep oılaıdy. Men polısıa kólikteriniń qaıda bara jatqanyn bilmeımin. Biz nege daıyndalýymyz múmkin? Búgin tek 17 qazan ǵoı", - dedi ol.
Mınıstrdiń orynbasary mereke kúnderi polısıa kúsheıtilgen rejımde jumys isteıtinin, zańsyz mıtıń uıymdastyrýǵa jol bermeıtinin atap ótti.
"25 qazan (Respýblıka kúni) memlekettik mereke ǵoı. Biz oǵan daıyndalamyz. Biz (İİM) kúsheıtilgen rejımde jumys isteımiz. Qazir ákimdikterden barlyq is-sharany surap jatyrmyz. Onda qoǵamdyq tártipti saqtaýdy qamtamasyz etemiz.
25 qazanǵa mıtıńke shaqyrýǵa toqtalaıyn. Ony DVK músheleri istep otyr. Qazaqstanda ol zańsyz ekstremıstik uıym bolyp sanalady. Biz eshqandaı mıtıń ótkizýge jol bermeımiz", - dedi ol.