Keıingi ýaqytta áleýmettik jelide taraǵan jańa aıyppul túrleri kólik júrgizýshileriniń nazaryn aýdardy. Jol qozǵalysy qaýipsizdigin kúsheıtý maqsatynda Ákimshilik quqyqbuzýshylyqtar kodeksine engizilgen ózgerister eldiń talqysyna tústi. Olardyń arasynda jalǵany da, tańǵaldyrǵany da bar. Sonymen, júrgizýshiler keıingi aıtylǵan erejelerden neni bilýi kerek? Aqshamnews.kz tilshisi zerttep kórdi.
Kólik terezesinen qolyn shyǵarǵandarǵa aıyppul salynatyny ras pa?
2025 jyldan bastap jolaýshylardyń kólik terezesi ne lúginen dene múshelerin shyǵarýy, qozǵalys kezinde esik ashqany úshin júrgizýshige 10 AEK (39 320 teńge) kóleminde aıyppul salynady. Bul norma buryn da bolǵan, biraq aıyppul qarastyrylmaǵan edi.
Mundaı shara jastardyń úılený toıy men mektep bitirý keshterinde qaýipsizdikti elemeı, kólik terezesinen shyǵyp ketý jaǵdaılarynan keıin qabyldanǵan. İİM Ákimshilik polısıa komıtetiniń basshysy Qaısar Sultanbaevtyń aıtýynsha, bul ereje azamattardyń ómiri men densaýlyǵyn qorǵaýǵa baǵyttalǵan.
Máselen, eger kólik qozǵalyp turǵan kezde jolaýshynyń qoly, basy kólik shekarasynan shyǵyp, qaýip tóndirse – bul zańbuzýshylyqqa jatady. Mundaı jaǵdaıda jaýapkershilik júrgizýshige de, jolaýshyǵa da júkteledi. İİM túsindirýinshe, temeki shegý úshin tereze ashyp, qoldy sál shyǵarǵany úshin birden aıyppul salynbaıdy.
Jyldamdyqty 60 km/saǵ-tan asyrǵandarǵa — 157 myń teńge aıyppul
2025 jyldan bastap jyldamdyqty saǵatyna 60 km/saǵ jáne odan da kóp mólsherde asyrǵan júrgizýshilerge 40 AEK kóleminde aıyppul salynady. Bul — 157 280 teńge.
İİM Ákimshilik polısıa komıtetiniń tóraǵasy Qaısar Sultanbaevtyń aıtýynsha, qala mańyndaǵy trassalarda ornatylǵan ortasha jyldamdyqty baqylaý júıeleri arqyly 15 myńnan astam osyndaı buzýshylyq anyqtalǵan.
Qarsy jolaqqa shyqqandar 9 aıǵa kýálikten aıyrylady
Qarsy baǵytqa shyǵý erejesi de kúsheıtildi. Eger buryn mundaı áreket jol-kólik oqıǵasyna ákelmese – júrgizýshi 6 aıǵa júrgizýshi kýáliginen aıyrylatyn. Al endi eger qarsy jolaqqa shyǵý apatqa sebep bolsa, júrgizýshi 9 aıǵa kólik júrgizý quqyǵynan aıyrylady. Bul ózgeris jaza mólsheriniń qaýipke saı bolýyn qamtamasyz etý úshin engizildi.
Aıta keteıik, naýryz aıynda da birqatar ózgerister eskertilgen edi. Máselen temirjol ótkelinen ótý erejesin buzǵandar – 20 AEK kóleminde aıyppul tóleıdi (buryn 10 edi), al eger apatqa sebep bolsa – 9 aıǵa kýáliginen aıyrylady. Sondaı-aq, jedel járdem men polısıa kóligine jol bermegenderge – 20 AEK aıyppul salynady (buryn 7), qaıtalansa – 40 AEK jáne 20 saǵat qoǵamdyq jumys (2025 jyldyń 1 qyrkúıeginen bastap).