Kúnkórý maqsatynda megapolıs Almaty kópshilikke qolaıly bolyp turǵandaı. Jan-jaqtan aǵylǵan jurtshylyq kólik júrgizýshisi qyzmetin tańdaıdy. Tańnyń atysynan kúnniń batysyna deıin kólik rólinde otyrý ońaı emes. Birneshe saǵatqa sozylǵan kólik keptelisi. Kósheniń qaınaǵan ómiri júıke júıeńe júk salary anyq. Onyń ústine, kóshelerdi baqylaıtyn kameralar júrgizýshiniń jibergen kemshiligin túsirip alyp, aıyppul salýda. Sondyqtan da jan-jaqtan aǵylǵan «júrgizýshiler» jubaıy nemese tanys-tamyrynyń atynan esep shot ashyp qoıǵan. Bul álgi aıyppuldy tólemeýdiń tóte joly bolsa kerek-ti.
Jalpy jol erejesin buzǵany týraly kólik júrgizýshisiniń ıesine habarlama jiberiledi me, jiberilse qansha ýaqyt ishinde degen sekildi saýalmen Almaty qalasy Polısıa departamenti Ákimshilik polısıa basqarmasynyń basshysy polısıa podpolkovnıgi Qulybaev Asqatqa habarlastyq.
Onyń málimeti boıynsha Almaty qalasynda 2023 jyldyń 4 aıynda jol erejesin buzý faktisi boıynsha-330 239 aıyppul tirkelgen. Onyń ishinde 94 962 azamattar aıyppulyn tólemegen. QR ÁQBtK-niń 893-babynyń 1-bóligi negizinde aıyppuldy ákimshilik jaýaptylyqqa tartylǵan tulǵa aıyppul salý týraly qaýly, aıyppul tóleý qajettigi týraly nusqama zańdy kúshine engen kúnnen bastap otyz táýlik ishinde keshiktirmeı tóleýi tıis. Belgilengen ýaqyt aralyǵynda aıyppul boıynsha tólem júrgizilmese, QR ÁQBtK-niń 894 babyna sáıkes aıyppul salý týraly qaýlyny nemese aıyppul tóleý qajettigi týraly nusqamany sot, ýákiletti organ (laýazymdy adam) jaýapqa tartylǵan tulǵanyń jalaqysynan nemese ózge de kiristerinen aıyppul somasyn májbúrleý tártibimen ustap qalý úshin ol jumys isteıtin nemese syıaqy, zeınetaqy, stıpendıa alatyn uıymnyń ákimshiligine jiberedi. Eger aıyppul salynǵan jeke tulǵa jumys istemeıtin bolsa nemese basqa da sebepter boıynsha aıyppuldy jalaqysynan nemese ózge de tabystarynan óndirip alý múmkin bolmasa, qaýlyny shyǵarǵan sot nemese ýákiletti organ aıyppul salý týraly qaýlyny, aıyppul tóleý qajettigi týraly nusqamany Qazaqstan Respýblıkasynyń zańnamasynda kózdelgen tártippen májbúrlep oryndatý úshin jeke sot oryndaýshysyna jiberedi. Aıyppul salý týraly qaýly nemese aıyppul tóleý qajettigi týraly nusqama jeke sot oryndaýshylary palatasyna joldanǵany týraly azamattardyń uıaly baılanystyń abonenttik nómiri boıynsha QR ÁQBtK-niń 743 -babyna sáıkes, habarlama joldanylady.
Ary qaraıǵy jumys jeke sot oryndaýshylarynyń quzyrynda. Sondyqtan biz Almaty qalasy jeke sot oryndaýshylar palatasynyń jetekshisi Qaıdarov Aıdyn Serikqazyulyna jolyqtyq.
-Jeke sot oryndaýshy – memleket aldynda bereshegi bar azamattardan májbúrlep óndirýshi. Avtokólik jaıynda sóz etsek, ómir bolǵan soń túrli jaǵdaı bolady. Bile tura nemese bilmeı erejeni buzady. Sol boıynsha hattama toltyrylyp, jol polısıa qyzmetkerleri óz quqyqtary boıynsha mindetterin oryndaıdy. Olar zań talaptary negizinde aıyppuldy tólemegen soń jeke sot oryndaýshylaryna isti joldaıdy. Demek, osy jaǵynan alatyn bolsaq, qanshama adam jol erejesin buzyp, tólemeı júre beredi. Ony kim óndiredi? Árıne, jeke sot oryndaýshylar óndiredi. Zań boıynsha jeke sot oryndaýshyǵa is jiberilgen kezde «Elektrondy úkimet portalynda» azamattardyń tirkegen uıaly baılanys abonenttik nómiri boıynsha avtomatty rejımde tirkelgen aıyppul boıynsha jáne onyń jeke sot oryndaýshylaryna joldanǵany týraly habarlama kelip túsedi. Onan keıin isti qolyna alǵan jeke sot oryndaýshysy tártip buzýshyǵa habarlasyp, is týraly eskertýi tıis. Munan soń, aıyppul tólenbese esep-shotyn buǵattaıdy. Esep-shotty buǵattaýǵa jeke sot oryndaýshylarynyń ǵana quzyreti jetedi. Mine, osylaısha májbúrlep memleket qazynasyna qarjy quıady. Adam bolǵan soń keıde qyzmetin asyra paıdalaný jaǵdaılary da kezdesetin shyǵar. Mundaı jaǵdaıda bizge shaǵymdansa tártip boıynsha shara qoldanamyz, -dedi ol.
Azamattardyń kóbi búgingi elektrondy júıeni meńgermegen. Sondyqtan osy elektrondy júıe arqyly túrli qyzmetterdi jasap, paıda taýyp otyrǵan adamdardyń kómegine júgingen kezde de óz telefonyńyzdy tirkeýin talap etýińizge týra keledi. Salǵyrttyq tanytsańyz ózgeniń nómirine Siz týraly aqparat baratyn bolatyn. Búgingi maqalany jazý barysynda saýattylyq – kóp jaǵdaıda óz jolyńyzdy tez tabýǵa múmkindik beredi.