Prezıdent Qasym-Jomart Toqaev elordadaǵy «Atameken» etno-memorıal kesheninde ótken Memlekettik tý kóterý rásimine qatysty. Eń aldymen, Qurmet qaraýyly rotasynyń bastyǵy rásimge daıyndyǵy jóninde Prezıdentke raport berdi. Sodan keıin Memlekettik ánuran shyrqalyp, Kók baıraǵymyz kóterildi, dep habarlaıdy Almaty-akshamy.kz.
Prezıdent Qasym-Jomart Toqaev jınalǵan qaýymdy memlekettik rámizder kúnimen quttyqtap, olar egemendik pen eldiktiń eń basty belgisi ekenin atap ótti.
«Kók baıraǵymyz, Eltańbamyz jáne Ánuranymyz – kúlli halqymyzǵa qasterli nyshandar. Biz úshin táýelsizdik – eń qymbat qundylyq, al týymyzdyń asqaq jelbiregeni – asa bıik mártebe. Batyr babalarymyz syn saǵatta árdaıym bir týdyń astynda jınalǵan. Bórili baıraq kúlli túrki jurtyn biriktirgen. Abylaı hannyń aq týy búkil qazaqtyń basyn qosqan. Alash týy arystarymyzdyń jigerin janyp, namysyn qaıraǵan. Biz babalarymyzdyń dańqty jolyn jalǵastyryp kelemiz. Baıraǵymyz Birikken Ulttar Uıymynyń tórinde tur. Ony ǵaryshkerlerimiz kók júzine kóterdi. Álpınıserimiz álemniń eń bıik shyńdaryna ornatty. Sportshylar jeńis tuǵyrynan jelbiretip, Ánuranymyzdy shyrqatty. Kúlli álem Qazaq elin kók baıraǵyna qarap tanıtyn boldy», – dedi Memleket basshysy.
Prezıdent qasterli nyshandarymyzdy qurmetteý árbir azamattyń perzenttik paryzy ekenine nazar aýdaryp, búgingi saltanatty rásimniń taǵylymdyq mán-mańyzyna toqtaldy.
«Biz asyl qundylyqtarymyzdy aıaq asty etýge jol bermeımiz. Bıyl memlekettik rámizderdi qorlaǵan adamdardy jazalaý sharalary kúsheıtildi. Túsindirý jumystaryna erekshe kóńil bólinip jatyr. Otanshyldyq memlekettik rámizderdi qasterleýden bastalady. Biz ulttyq nyshandarymyzdy ulyqtaý arqyly óskeleń urpaqqa úlgi-ónege kórsetemiz. Olardy otansúıgishtik, jasampazdyq rýhta tárbıeleımiz. Sondyqtan búgingi saltanatty rásimniń taǵylymdyq, tárbıelik máni aıryqsha», – dedi Qasym-Jomart Toqaev.
Sonymen qatar Prezıdent memlekettik rámizder tarıhymyzdy, ózindik bolmysymyzdy jáne halqymyzdyń jarqyn bolashaqqa umtylysyn aıǵaqtaıtynyn atap ótti.
«Memlekettik rámizderde búkil Qazaqstan halqyn biriktiretin, jalpyulttyq biregeıligimizdi nyǵaıtatyn qudyretti kúsh bar. Aıtýly merekeler men álemdik dúbirli sport saıystarynda jeńiske jetken kezde júregimizde Otanǵa degen súıispenshilik oty laýlap, elimizge degen maqtanysh sezimi paıda bolady. Kók baıraǵymyz, Eltańbamyz jáne Ánuranymyz – memleketimizdiń mártebesi, halqymyzdyń ar-namysy. Olar alǵa qaraı nyq qadam basyp, bıik maqsattarǵa qol jetkizý jolynda kúsh-jiger beredi», – dedi Prezıdent.
Saltanatty rásim barysynda joǵary áskerı oqý oryndarynyń 12 úzdik túlegi Qazaqstan Prezıdenti – Qazaqstan Respýblıkasy Qarýly Kúshteriniń Joǵarǵy Bas qolbasshysynyń qolynan ofıserlik shen aldy.
Shara sońynda Memlekettik kúzet qyzmetiniń, Qorǵanys jáne İshki ister mınıstrlikteriniń Qurmet qaraýyly rotalary Prezıdent pen jınalǵan qaýym aldynan saltanatty marshpen júrip ótti.
Tý kóterý rásimine Parlament Májilisiniń tóraǵasy Erlan Qoshanov, Premer-mınıstr Álıhan Smaıylov, Memlekettik keńesshi Erlan Qarın, Prezıdent Ákimshiliginiń Basshysy Oljas Bektenov, memlekettik organdar basshylary, Úkimet músheleri, Parlament depýtattary, Memlekettik rámizder men vedimistik jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komısıa músheleri, joǵary áskerı oqý oryndarynyń kýrsanttary men olardyń týystary qatysty.
