Depýtat bul máseleni sheshý úshin Úkimet naqty is-sharalar qabyldaýy kerek ekenin aıtty
Májilistegi Úkimet saǵatynda depýtat Erlan Saırov shekaradaǵy aýdan men aýyldardaǵy jaqyn elderdiń uıaly baılanysy men radıo tolqyndarynyń jumys isteıtinin aıtty, dep habarlaıdy Almaty-akshamy.kz.
«Prezıdentimiz shekaralyq aýyl men aýdandardyń damýy máselesin óziniń baqylaýyna alyp otyr. Qazaqstanda shekara túbinde turatyn 50-ge jýyq aýyl bar. Sol aýyldarda jol, medısına, uıaly baılanys, sý máselesi áli de ózekti. Mysaly, keıbir aýylda medpýnkt bolsa, feldsher bolmaıdy. Al keı aýylǵa jazda da, qysta da jetý qıyn. Ol jaqqa jol joq. Jol bolmasa, azamattardyń ol jaqta turýǵa qulqy bolmaıdy», - dedi ol.
Saırov ataǵandaı, shekaralyq aýyldardaǵy eldiń ulttyq qaýipsizdigine keri áser etetin eń negizgi másele – sheteldik uıaly operatorlardyń jumys istep turǵany.
«Mysaly, Qytaıǵa qaraıtyn bolsa, Zaısań, Marqakól, Maqanshy, Almaty, Narynqoldardyń barlyǵynda Qytaıdyń uıaly operatorlary istep tur. Reseıge qaraıtyn bolsaq, solardyń uıaly operatory istep tur. Bul - bizdiń elimizdiń tutastyǵyna, búgingi tańda ulttyq qaýipsizdikke tikeleı áser etetin másele. Osy máseleni qalaı sheshemiz? SHQO-daǵy Tarbaǵataı men Zaısanda mınıstrlik pen ákimdik birigip, uıaly operatorlaryn qoıyp jatyr. Al basqa shekaralas aýdandardaǵy másele de osyndaı. Bul máseleni sheshý úshin Úkimet naqty is-sharalar qabyldaýy kerek», - dedi Erlan Saırov.
Ulttyq ekonomıka mınıstri Álibek Qýantyrov bul másele keshendi túrde sheshiletinin aıtty.
«Shekaralas aýyldardyń deńgeıi barlyǵy ártúrli. Shyǵysta bir jaǵdaı, soltústikte bir jaǵdaı, Reseı jaqta bir jaǵdaı bolyp otyr. Shekaradaǵy shekaralyq zastavalardy kúsheıtý men onyń tóńiregindegi aýyldardy damytý kózdelip otyr», - dedi ol.
Óz kezeginde Sıfrlyq damý jáne aeroǵarysh ónerkásibi vıse-mınıstri Asqat Orazbek radıo tolqyndardy shekarada shekteý múmkin emes ekenin aıtty.
«Baılanys salasyndaǵy óńirlik ákimshilik basshylary 2019 jyly shekara arqyly radıo aqparatty taratýdyń maksımaldy qashyqtyǵy 15 shaqyrymǵa deıin bekitildi. Ákimdikterdiń málimetinshe, el shekarasynyń aýmaǵynda 770 aýyl ornalasqan. Onyń ishinde 228 aýylda sheteldik operatorlardyń baılanys sıgnaldary bar. Ol ras. Qoljetimdi ınternet jobasyna sáıkes, biz 2024-2027 jyldary osy aýyldarǵa jaı baılanys emes, sapaly ınternetti tartýdy kózdep otyrmyz», - dedi ol.
Erlan Saırov kórshiles elder, onyń ishinde Qytaı, Ózbekstan, Reseı sheteldik uıaly baılanystaryn shekteıtinin aıtty.
«Olar ınternet degenimiz ıdeologıa ekenin biledi. Bizge de sheteldik uıaly baılanysty shekteıtin qalqan qurýymyz kerek. Bul - bizdiń ulttyq qaýipsizdigimizdiń eń negizgi aspektisi», - dedi depýtat.