Ahmet Baıtursynulynyń 150 jyldyǵyna arnalǵan is-sharalar álemdik deńgeıde atap ótilýde.
Bul týraly búgin Ahmet Baıtursynulyna arnalǵan halyqaralyq ǵylymı-praktıkalyq konferensıada málim boldy, dep habarlaıdy Almaty-akshamy.kz QazAqparatqa silteme jasap.
Konferensıa barysynda Memlekettik hatshy Erlan Qarın Ahmet Baıtursynulynyń 150 jyldyǵy ulttyq kún tártibinde turǵan ult rýhanıaty úshin aýqymdy taqyryptardyń biri ekenin atap ótti.
«Halqymyz óziniń tarıhynda erekshe orny bar eki tulǵany «Ult ustazy» dep ardaqtaǵan. Aldymen, árıne, uly Abaıdy aıtamyz. Odan keıin Ahmet Baıtursynulynyń esimi atalady. Alash kósemi, qazaqtyń birtýar perzenti Ahmet Baıtursynulynyń týǵanyna bıyl 150 jyl tolyp otyr. Bul mereıtoıdy IýNESKO deńgeıinde atap ótemiz. Táýelsizdik ultymyzdyń jadyn jańǵyrtyp, tarıhı tamyrymyzdan qaıtadan nár alýymyzǵa jol ashty. Bul rette ult ustazynyń eńbegin zerdelep, ony mol murasyn urpaq sanasyna sińirý barshamyzǵa ortaq mindet», - dedi E. Qarın.
Bul oraıda Memlekettik hatshy osydan bir ǵasyr buryn qazaq halqy ult zıalylarynyń bastamasymen ǵalymnyń 50 jyldyǵyn atap ótkenin eske saldy.
«Sodan beri týra bir ǵasyr ótip otyr. Bir ǵasyrdan keıin de Ahań taǵy da ultty uıystyryp, ult zıalylaryn bir jerge jınap otyr. Bul da urpaqtar sabaqtastyǵynyń bir belgisi. Búgin, mine, Ahań ańsaǵan táýelsiz eldiń urpaqtary onyń 150 jyldyq mereıtoıynda bas qosyp otyr», - dedi Erlan Qarın.
Sonymen qatar ol Ahmet Baıtursynulynyń qazaqtyń ult bolyp saqtalyp qalýy úshin tilge aıryqsha mán bergenin atap ótti.
«Onyń: «Egerde biz qazaq degen ult bolyp turýdy tilesek, qarnymyz ashpas qamyn oılaǵanda, tilimizdiń de saqtalý qamyn qatar oılaýymyz kerek» degen sózderi – sonyń aıqyn dáleli. Ahań ulttyq álipbıimizdi ázirlep, oqýlyqtar jazdy, til ǵylymyna túren saldy. Tildiń ultty saqtaýdaǵy orasan zor mańyzyn jurtymyzdyń sanasy sińire otyryp, qazaq tilin ǵylymǵa beıimdedi. Osy tarıhı eńbeginiń arqasynda ol qazaq til biliminiń atasy, ult ustazy atandy. Ahań negizin qalaǵan til ǵylymy onyń esimin ataýǵa tyıym salǵan keńes dáýirinde de jappaı qoldanysta boldy», - dedi Erlan Qarın.
Onyń sózine qaraǵanda, til bilimi men ádebıettaný ǵylymdarynda A.Baıtursynuly engizgen termınder men uǵymdar eshqashan ózektiligin joǵaltpaıdy.
«IýNESKO kóleminde jáne elimizdiń barsha óńirinde ótkiziletin mereıtoı sharalaryna barshamyz belsene atsalysýymyz qajet. Parıjde jáne Ystanbulda arnaıy is-sharalar uıymdastyrylady. Túrkistanda halyqaralyq kongres ótedi, basqa da jumystar josparlanǵan. Sonyń bárinde Ahmet Baıtursynulynyń mol murasy men qaıratkerlik qyzmeti dáriptelip, laıyqty baǵa beriledi dep oılaımyn», - dedi Memlekettik hatshy.
Sondaı-aq halyqaralyq ǵylymı-praktıkalyq konferensıaǵa qatysýshy qazaq jáne sheteldik ǵalymdar ahmettanýdyń qazirgi ózekti máselelerin aıta otyryp, aldaǵy ýaqytty atqarylýy tıis máselelerdi kóterdi.
Bul konferensıa qararynan kórinis tapty:
- Ahmet Baıtursynulynyń ómirbaıandyq derekterin tolyqtyrý úshin Qazaqstandaǵy jáne sheteldegi arhıvterge ǵylymı is-saparlar uıymdastyrý;
- Ǵalymnyń tolyq akademıalyq shyǵarmalar jınaǵyn ázirleý, shyǵarý jáne taratý;
- Eńbekterin shet tilderine aýdarý, halyqaralyq keńistikke tanytý;
- «Ahmet Baıtursynuly» tósbólgisin ázirlep, til jáne jalpy qoǵamdyq-gýmanıtarlyq sala mamandaryna marapattaý;
- Joǵary oqý oryndarynyń stýdentteri úshin «Ahmet Baıtursynuly» atyndaǵy stıpendıa taǵaıyndaý. Osy oraıda qarar jobasy konferensıa qorytyndysynda oqylyp, talqyǵa salynyp bekitildi.