Tashkentte «Jibek jolynyń injý-marjany» atty halyqaralyq kınofestıval ótedi
Oǵan álemge tanymal 50-den astam kınojuldyz qatysady. Uıymdastyrýshylar 28 qyrkúıekten 3 qazanǵa deıin ótetin kınofestıvalge qurmetti qonaq bolatyn juldyzdardyń atyn aıtpaı, qupıa saqtap, olardyń esimderin tek baspasóz máslıhatynda aıtty, dep habarlaıdy Almaty-akshamy.kz QazAqparatqa silteme jasap.
Tanymal qonaqtar arasynda Lúk Besson, Stıven Sıgal, Mıthýn Chakrabortı, Nıkıta Mıhalkov, Oleg Taktarov, Franko Nero, Jerar Deparde, Tımýr Bekmambetov, túrik serıaldarynyń juldyzdary men taǵy basqalar bar.
Sondaı-aq, baspasóz máslıhaty barysynda «Álemdik kıno kúnderi» baǵdarlamasy aıasynda usynylatyn fılmder týraly beınerolıkter kórsetildi.
Eske salaıyq, Azıa, Afrıka jáne Latyn Amerıkasy elderiniń halyqaralyq kınofestıvali dep te atalatyn Tashkent halyqaralyq kınofestıvali Ózbekstan astanasynda 1968-1997 jyldary dástúrli túrde ótip turdy.
«Jibek jolynyń injý-marjany» atty kınofestıval 2021 jyly Ózbekstan Prezıdenti Shavkat Mırzıóevtiń bastamasymen qaıta uıymdastyrylyp, endi jyl saıyn ótedi. Kınofestıvaldi Ózbekstan kınematografıa agenttigi uıymdastyryp otyr.