Jetisýda umyt qalǵan talantty aqyn Qaırat Álimbekovtiń «Joq izdegen jigit» jyr jınaǵy jaryq kórdi, dep habarlaıdy Almaty-akshamy.kz.
Aryndy aqyn, qarymdy jýrnalıs Qaırat Álimbekovti búgingi qazaq ádebıetiniń aǵa býyny jaqsy biledi. Ýaǵynda qazaq baspasóz salasynda óziniń qoltańbasyn qaldyryp, jyr áleminde de júırikterdiń biri atanǵan. Áıtse de ǵumyrdarıasy qysqa boldy. Bertin kele esimi de umytyla bastady. Degenmen Jetisý oblysynyń ákimi hám birge oqyǵan dosy Beıbit Isabaev bastaǵan qalamdas áriptesteri qalamgerdiń murasyn qaıta jańǵyrtýǵa bel baılady. Budan bulaı oblys kóleminde jyl saıyn dástúrli túrde aqynnyń rýhyna arnalǵan músháıra uıymdastyrylady.
BAQ.kz taratqan málimet boıynsha, áýeli bir top zıaly qaýym ári zamandastary Qaratal aýdanyńdaǵy aqyn jerlengen zıratqa baryp, topyraq alyp, quran baǵyshtady. Odan keıin M.Tynyshbaev atyndaǵy tarıhı-ólketaný mýzeıinde aqyn Qaırat Álimbektiń ómiri men shyǵarmashylyǵyna arnalǵan «Ǵazal-ǵumyr jarqyly» buryshy ashyldy. Munda aqynnyń jeke zattary qoıylǵan. Oqyrmandar mýzeıden qalamgerdiń qylqalamyn, otbasylyq sýretterin, kýálikterin, jazý mashınasyn, portfelin, kostúmin, ártúrli maqtaý qaǵazdary men dombyrasyn kóre alady.
Qazirgi «Jetisý» oblystyq gazetinde áriptes boldyq. Kez kelgen taqyrypty jik-jigimen, butarlap turyp jazatyn. Kólemdi maqalalaryn bylaı qoıǵanda, qyp-qysqa ǵana habardyń ózin qaraóleńmen órnektep jiberetin sheberligin de umytqan joqpyz. Kez kelgen maqalasy maqal-mátelge, naqyl sózderge tunyp turatyn-dy. Ulaǵatty sózderge keıbir áriptester sekildi uzyn-sonar anyqtama berip jatpaıtyn, ári ózine «menshiktep» te almaı, árdaıym tyrnaqsha ishine salýdy umytpaıtyn. Sol tyrnaqsha ishindegi bir sóılem baqandaı bir abzastyń júgin kóterip turatyn, - deıdi jýrnalıs kýrstasy Nurjamal Álisheva.
Aqynnyń eske alýǵa arnalǵan saltanatty sharaǵa jınalǵan qaýym biz oılaǵannan da kóp boldy. Aldymen B.Rımova tyndaǵy Taldyqorǵan drama teatrynyń foıesinde «Joq izdegen jigit» jyr jınaǵynyń tusaýy kesildi. Sodan keıin sahna tórinde aqynnyń shyǵarmashylyǵy men ómirine arnalǵan beınefılm kórsetildi.
«Jyrǵa aınalǵan jampozym» eske alý keshiniń betashar sózin oblys ákimi Beıbit Óksikbaıulynyń sóılep, esti esteligimen bólisti.
«Biz Qaıratpen QazMÝ-de birge oqydyq, bir bólmede turdyq. Jýrnalısıka salasynda 1980-shi jyldarda qatar qyzmet ettik, úzeńgiles, pikirles, dos-joldas boldyq. Qaırattyń minezi kópshil, parasaty tereń, boıynda lapyldaǵan jalyny bar, aryndy, adýyndy, rýhty azamat bolatyn. Onyń oıǵa utqyr, sózge sheshendigi, azamattyq bolmysy, eljandy minezi jyrlarynan aıqyn ańǵarylyp turatyn.
Ókinishke qaraı Qaırat aqyn aramyzdan erte ketti. Nebary 43 jyl ómir súrip, jasyndaı jarq etip óte shyqty.
«Meniń taqyrybym - Adam» dep ózi aıtyp ketkendeı:
Aǵyl-tegil kóńilde týlaıdy óleń,
Daýysymdy tik turyp tyńdaıdy álem.
Shat ómirden osynaý shabyt alyp,
Jyrlaı berem Adamdy, jyrlaı berem!
- dep óleńge aǵynan jaryldy», dedi óńir basshysy B. Isabaev.
Saltanatty sharada qalamgerdiń zamandastary men áriptesteri jastyq shaqtarynan syr tarqatyp, aqyn jaıly aq lebizin jetkizdi. Sondaı-aq aqynnyń óleńderine jazylǵan ánder shyrqalyp, kórermenniń yqylasyna bólendi.
Jıyn sońynda Qaırat Álimbekovtyń rýhyna arnalǵana as berildi.