Úlken Almaty aınalma avtomobıl joly – 1-A tehnıkalyq sanatyndaǵy avtoban. Bul týraly «ÚAAAJ ınvestısıalar men operasıalar» JSHS dırektory Aıman Januzaqova-Baran aıtty, dep habarlaıdy Almaty-akshamy.kz.
«ÚAAAJ-niń jalpy uzyndyǵy – 66 shaqyrym. Onyń 52 shaqyrymy 6 jolaqtyq, 14 shaqyrymy 4 jolaqtyq jol. Bul jolda saǵatyna 120-140 shaqyrym jyldamdyqpen júrýge bolady. Jalpy, jol boıynda 43 kópir bar. Aınalma jol Almaty oblysynyń úsh aýdanyn basyp ótedi: Qarasaı, İle, Talǵar aýdany. Josparǵa sáıkes, jolda júrý aqyly túrde bolady. Biz toqtaýsyz qozǵalys kezinde bolatyn aqyly júıeni josparlap jasadyq. Baqylaý arkalary arqyly toqtaýsyz ótýge bolady, onda bizdiń beınekameralar kólikterdi túsirip, keıin kólik ıesine jol aqysy týraly habarlama jiberiledi», - dedi spıker.
Ol sondaı-aq, Úlken Almaty aınalma avtomobıl joly Indýstrıa jáne ınfraqurylym mınıstirliginiń kómegimen, Eýropalyq qaıta qurý jáne damý banki, Eýrazıalyq damý banki, Islam damý bankiniń sındıkat bankter bolýymen salynǵanyn aıtty, dep jazdy Qazaqparat.
«Konsepsıa shartyna 2018 jyly qol qoıylǵan edi. 2020 jyldyń tamyz aıynda qarjylyq jabýdy aıaqtadyq. Osydan soń ÚAAAJ qurylysy bastaldy. Konsepsıa boıynsha qurylys merzimi 50 aı bolǵan edi, alaıda merdiger kompanıalarymyzdyń kómegimen qurylys jumystaryn 32 aıda bitirdik. Jalpy, jol salý kezinde aýmaǵy 22 mln kýb-ten astam jerde jumys júrdi, 7 kólik aıryǵy salyndy. Jol jabyndysy asfált-beton qospasynan jasaldy. Qurylys aıaqtalǵan soń biz endi paıdalaný merzimine kóshtik. Biz joldy 15 jyl boıy kútip ustaýdy josparlap otyrmyz», - dedi Aıman Januzaqova-Baran.