16 maýsymnan 17-ne qaraǵan túni fýtboldan 2024 jylǵy Eýropa chempıonatyna irikteý satysyndaǵy San-Marıno jáne Qazaqstan quramalary kezdesedi, dep habarlaıdy Almaty-akshamy.kz.
Kezdesý elorda ýaqytymen 00:35-de bastalyp, «Qazsport» telearnasynan tikeleı efırde kórsetiledi.
Oıyn Italıanyń Parma qalasyndaǵy 27906 jankúıerge arnalǵan «Ennıo Tardını» stadıonynda ótkiziledi.
Quramalar H tobynda oıyn kórsetedi. Qarsylastary – Slovenıa, Danıa, Soltústik Irlandıa, Fınlándıa.
QazAqparat málimeti boıynsha bul kezdesýde grekıalyq Anastasıos Papapetrýs bas tóreshi qyzmetin atqarady. Oǵan otandastary Trıfon Petropýlos pen Iordanıs Aptosoglý kómek jasaıdy.
Qazirge deıin quramalar eki oıynnan ótkizdi. Qazaqstandyq fýtbolshylar óz alańynda Slovenıadan 1:2 esebimen jeńilip, Danıany 3:2 esebimen tize búktirgen edi.
Al San-Marıno quramasy Soltústik Irlandıa men Slovenıadan 0:2 esebimen jeńilip qaldy.
San-Marıno - álemdegi álsiz quramalardyń biri. FIFA reıtıńinde eń sońǵy 201 orynda tur.
Eki qurama buǵan deıin 2020 jylǵy Eýropa chempıonaty irikteý satysynda I tobynda synǵa tústi. Astanada ótken alǵashqy kezdesýde qazaqstandyq fýtbolshylar 4:0 esebimen jeńiske jetse, syrt alańda 3:1 esebimen basym tústi.
Sondaı-aq, búgin atalǵan topta Danıa men Soltústik Irlandıa, Fınlándıa men Slovenıa sheberlik baıqasady.
Al V tobynda Gıbraltar men Fransıa, Grekıa men Irlandıa jasyl alańǵa shyǵady.
S tobynda Malta men Anglıa, Soltústik Makedonıa men Ýkraına, D tobynda Ýels pen Armenıa, Latvıa men Túrkıa oınaıdy.
I tobynda Andorra men Shveısarıa, Belarýs pen Izraıl, Kosovo men Rýmynıa sheberlik baıqasady.