Jyl sońyna deıin 12 blok-modýldi medısınalyq keshender iske qosylmaq
Aýyldyq jerlerdegi medısınalyq qyzmet sapasyn jaqsartý maqsatynda qolǵa alynǵan qurylys nysany Alakól aýdanynyń Kókjar aýylynda turǵyzyldy. Bul - oblysta bıylǵa BMK-dan salý josparlanǵan on eki mekemeniń jetinshisi, dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Aýyl turǵyndarynyń qýanyshyna ortaqtasqan aýdan ákimi Almas Ábdınov, Jylandy aýylynyń ardagerler keńesiniń múshesi Murathan Mereev, eńbek ardageri İlıas Qasymov kópshilikke izgi tilekterin bildirdi.
Ǵımarattyń lentasy qıylǵan soń kelýshiler mekemeniń ishin aralap kórdi. Bul medısınalyq pýnkt Kókjar aýylynyń 160 turǵynyna qyzmet kórsetedi.
Jobanyń jalpy quny – 39 mln. teńge. Ǵımarattyń aýmaǵy – 108 sharshy metr. 12 turǵynjaıy bar, atap aıtqanda vestıbúl, dáliz, dárihanasy bar tirkeý orny, akýsherlik qabyldaý bólmesi, egý bólmesi, prosedýralyq kabınet, materıaldar alý men zertteý bólmesi, orta medısınalyq qyzmetkerler bólmesi, 2 dárethana bólmesi, sol sıaqty basqa da turmystyq-sharýashylyq qajettiliktegi turǵynjaılary bar. Ystyq sý, jylý júıesi júrgizilgen, jeldetkish ornatylǵan.
Jalpy jyl sońyna deıin óńirde taǵy 5 blok-modýldi keshendi iske qosý josparlanǵan. Aqsý, Alakól, Eskeldi, Kóksý, Qaratal jáne Kerbulaq aýdandarynda jalpy quny 900 mln.teńge bolatyn barlyǵy 12 nysan josparlanǵan. Mamandardyń aıtýynsha, blok-modýldi keshender berik, qarapaıym ornatylatyn, uzaq qyzmet etetin qurylys túri. Sonymen birge qolaısyz aýa raıyna tótep bere alady, olardyń qyzmet etý merzimi 30 jyl dep mejelenedi.