2030 jylǵa deıingi «Jetisý oblysyn keshendi gazdandyrý» óńirlik sqemasy aıasynda aımaqtaǵy 358 eldi mekenniń 192-sine tabıǵı otyn jetkizý kózdelip otyr. Qazirgi tańda 84 aýylǵa ınfraqurylym tartylyp, bul jalpy jospardyń 58,2%-yn qurap otyr. Nátıjesinde 400 myńnan astam adam (101,8 myń abonent) ómir sapasyn jaqsartýǵa múmkindik aldy, dep habarlaıdy aqshamnews.kz
Prezıdent tapsyrmasyna sáıkes, 2025 jyly taǵy 42 eldi mekenge kógildir otyn beriledi dep josparlanǵan. Osy maqsatta respýblıkalyq jáne jergilikti búdjetterden jalpy somasy 7,9 mlrd teńge bólindi, onyń ishinde 21 joba – 2024 jyldan ótpeli. Qoǵaly aýylynan basqa barlyq nysandarda jumystar aıaqtaldy. Bul eldi mekende gaz qubyrynyń 80 shaqyrymynan 35 shaqyrymy tartyldy.
24 jańa joba boıynsha 3,5 mlrd teńge ıgerildi, aldaǵy ýaqytta taǵy 18 jobanyń qurylysy bastalmaq. Bul jumystardyń jalpy quny – 15,9 mlrd teńge. Atalǵan jobalardy aıaqtaý úshin Energetıka mınıstrligi qosymsha 25,6 mlrd teńgege búdjet ótinimin joldady.
Atqarylyp jatqan sharalardyń nátıjesinde Jetisý oblysynda kógildir otynǵa qosylatyn eldi mekenderdiń sany 126-ǵa jetip, qamtý deńgeıi 71,4%-dy quraıtyn bolady. Bul – 500 myńnan astam turǵynnyń turmystyq jaǵdaıyn jaqsartý degen sóz.
Sonymen qatar, qazirgi sqemaǵa enbegen taǵy 22 aýyl boıynsha jobalyq-smetalyq qujattama ázirlenip jatyr.
Anyqtama úshin:
2022–2024 jyldar aralyǵynda respýblıka kóleminde 371,1 mlrd teńge bólinip, 14 myń shaqyrymnan astam gaz qubyry tartyldy. Eldegi gazdandyrý deńgeıi 62,4%-ǵa jetip, tabıǵı otynmen qamtylǵan halyq sany 11 mln-nan 12,6 mln adamǵa artty.