Bul týraly Almaty qalasynyń ákimi E. Dosaev Jetisý aýdanynyń turǵyndarymen kezdesýinde aıtty dep habarlaıdy almaty-akshamy.kz
«Halyq qatysatyn búdjet» baǵdarlamasy boıynsha osy jyldyń basynan beri 8 joba iske asyryldy. 3 aýla alańyna, 2 skverge jóndeý júrgizildi, Qulager shaǵyn aýdanyndaǵy Arbatty balalar oıyn keshenderimen toltyrý aıaqtaldy, 2 jańa jaıaý júrginshiler aımaǵy quryldy.
Bıyl qazan aıynyń sońyna deıin taǵy 13 joba aıaqtalady. Uzyndyǵy shamamen 1 shaqyrym bolatyn 2 jańa jaǵalaý (Esentaı ózeniniń boıymen Chernovskaıa kóshesi jáne Qarasý ózeniniń boıymen Omarov kóshesi), Qulager shaǵyn aýdanynda uzyndyǵy 40 m jáne bıiktigi 4 m bolatyn barlyq maýsymǵa jaramdy syrǵanaq, «Rabochıı posólokta» jańa demalys aımaǵy salynady jáne 9 aýla jóndelip, jańa balalar alańdary ornatylady.
Sonymen qatar, aǵymdaǵy jáne kúrdeli jóndeý jumystary sheńberinde osy jyldyń qarasha aıynda jalpy uzyndyǵy 1,6 shaqyrym bolatyn taǵy 2 jaǵalaý paıda bolady. Bıylǵy 26 mamyrda turǵyndar Aınabulaq-1, Aınabulaq-3 shaǵyn aýdandaryndaǵy
2 skverdi jáne Qulager shaǵyn aýdanyndaǵy parkti jóndeý týraly másele kótergen. Turǵyndar jaryqtyń nasharlyǵy men sýarý júıesiniń joqtyǵyna shaǵymdandy. Búgingi tańda Aınabulaq-1 jáne Aınabulaq-3 shaǵyn aýdandarynda skverlerdi aǵymdaǵy jóndeý jumystary aıaqtalyp qaldy. Gúlder parkinde jóndeý júrip jatyr.
Qulager shaǵyn aýdanyndaǵy skverde sýarý júıesin jáne syrtqy jaryq jelilerin rekonstrýksıalaý jumystary júrip jatyr. Jumystardy osy qyrkúıek aıynyń sońyna deıin aıaqtaý josparlanǵan.