Medısınalyq qyzmet qadamdyq qoljetimdilikte – Almatynyń Jetisý aýdanynda jańa emhana ashylady, dep habarlaıdy almaty-akshamy.kz
Jumys sapary barysynda qala ákimi Erbolat Dosaev 2023 jyly emhana retinde satyp alynǵan ǵımaratty qaıta jańartýmen jáne kúrdeli jóndeý barysymen tanysty. Raıymbek dańǵyly, 263/2 mekenjaıyndaǵy jańa medısınalyq mekeme medısınalyq-sanıtarlyq alǵashqy kómektiń (MSAK) biryńǵaı standartyna sáıkes jumys isteýge kóshken, ol byltyrdan bastap Almatyda engizile bastaǵan.
Jalpy aýdany 1547 sharshy metr bolatyn 4 qabatty ǵımarat №33 emhananyń balansyna berildi. Úı-jaıdy ishki jóndeý jáne árleý aıaqtaldy. Medısınalyq jıhaz jáne jabdyq satyp alynyp jatyr.
Bir aýysymda 240 adam qabyldaýǵa eseptelgen emhanaǵa Jetisý aýdanynyń 30 myń turǵyny tirkeledi. Buryn Almaly aýdanynyń №5 jáne №8 emhanasyna medısınalyq kómekke júgingen «Jumysshylar kenti» alabynyń jáne jaqyn mańdaǵy shaǵyn aýdan turǵyndaryna «Qadamdyq qoljetimdilik» qaǵıdaty boıynsha sapaly medısınalyq qyzmet kórsetiledi.
Gınekolog, otolarıngolog, oftalmolog, nevropatolog, fýnksıonaldyq dıagnostıka dárigeri, kardıolog jáne t.b. jalpy 234 joǵary bilikti mamannan turatyn medısınalyq mekemeniń shtaty qalyptasyp jatyr.
Qala basshysyna qazirgi ýaqytta medısınalyq lısenzıa alý boıynsha jumystar júrgizilip jatqany baıandaldy. Sonymen qatar, sanıtarlyq talapqa sáıkes bolý úshin jaqyn jerde ornalasqan kólik jýý ornyn satyp alý qajet.
Jaqyn mańdaǵy alaptardyń turǵyndary ákimge medısınalyq mekemeniń ashylýyn asyǵa kútetinin aıtty. Jer ıesi usynylǵan ótemaqymen kelispegen kórinedi. Endi jer telimin alyp qoıý máselesi sot arqyly sheshiledi, sodan keıin medısınalyq mekeme alǵashqy pasıentti qabyldaýǵa kirisedi.
Jetisý aýdanynda qadamdyq qoljetimdilikti qamtamasyz etý jáne medısınalyq kómektiń sapasyn arttyrý aıasynda bıyl taǵy eki jańa emhana ashý josparlanǵan. Atap aıtsaq, Omarov kóshesindegi bir aýysymda 300 kelýshige jáne Núsipbekov kóshesinde bir aýysymda 200 kelýshige arnalǵan emhana.
Ol úshin qala ákimdigi medısınalyq mekemege qoıylatyn talapqa sáıkes ǵımarattardy satyph aldy. Qazir onda kúrdeli jóndeý jumystary júrgizilip jatyr.
Búginde Jetisý aýdanynda 200 myńǵa jýyq adam turady. Aýdanda №11, №21 jáne «Qulager» emhanasy syndy úsh qalalyq emhana jumys isteıdi. Osy jyldyń maýsym aıynda «Kemel» shaǵyn aýdanynda aýysymyna 200 kelýshige arnalǵan otbasylyq dárigerlik ambýlatorıa ashyldy.