Almaty qalasynyń saýda oryndarynda «Sapaly ónim» týraly jáne jańa zań jobalarynyń normalaryn túsindirý jumystaryn júrgizý boıynsha jyljymaly mobıldi zań qyzmeti jumysyn jalǵastyrýda. Maqsaty – turǵyndarǵa tutynýshylyq quqyqtaryn qorǵaı bilýi úshin aqparattyq keńester berý.
Jyljymaly mobıldi zań qyzmetiniń músheleri túsindirme barysynda «Sapaly ónim» jobasynyń basty mindeti – ishki naryqta azyq-túlik ónimderiniń qaýipsizdigin qamtamasyz etýge baǵyttalǵanyn jáne jańa zań jobasy qoǵamnyń ómir súrý sapasyn arttyrýǵa, tutynýshylardyń quqyqtaryn qorǵaý máselelerinde úkimettik emes ınstıtýttardyń rólin kúsheıtýge baǵyttalǵanyn halyqqa jetkizý. Sala mamandary ashyq alańda, erkin formatta ótkizip júrgen júzdesýlerde osy máselelerdi túsindirýde. Al óz kezeginde qala turǵyndary da tolǵandyryp júrgen suraqtaryn qoıyp, pikirlerimen bólisedi.
Bul jobany Almaty qalasy Qoǵamdyq damý basqarmasynyń memlekettik áleýmettik tapsyrysy negizinde jáne Almaty qalasy boıynsha Saýda jáne tutynýshylardyń quqyǵyn qorǵaý departamentiniń baǵyt berýimen halyqaralyq «Janashyr» qoǵamdyq qory júzege asyrýda. Mobıldi zań qyzmeti qalanyń barlyq aýdanyndaǵy bazarlar men saýda ortalyqtarynda bolyp, halyqqa tutynýshylyq quqyqtaryn qorǵaý máseleleri boıynsha zańgerlik keńester berýde.
Qazirgi kúni Áýezov, Almaly, Alataý aýdandaryndaǵy saýda ortalyqtarynda tutynýshylarǵa keńester berdi. İs-shara barysynda tutynýshylarmen saýalnamalar júrgizilip, aqparattyq paraqshalar taratylýda.
Osy jyldyń sońyna deıin jalǵasatyn joba barysynda qaladaǵy saýda oryndary, mekemeler, joǵary oqý oryndary stýdentteri arasynda oqytý-úıretý jumystaryn júrgizbek. Sonymen qatar, Instagram, Facebook, Telegram áleýmettik jelilerinde «Tutynýshy- Potrebıtel» atty aqparattyq akkaýnttar ashylyp, WhatsApp jelisinde 8 700 862 84 54 nómirine azamattardyń suraqtary men shaǵymdary qabyldanýda.
Bul bastama Almaty qalasynyń turǵyndaryna tutynýshy retindegi óz quqyqtary týraly kóbirek habardar bolýǵa jáne qajet bolǵan jaǵdaıda olardy tıimdi qoldanýǵa múmkindik beredi.
Meıramkúl JUBANOVA, Almaly aýdanynyń turǵyny:
– Bıyl mamyrdyń basynda dezınfeksıa jasaıtyn jaýapkershiligi shekteýli seriktestikpen úıime dezınfeksıa jasatýǵa kelisimshartqa otyryp, qolma-qol 60 myń teńge tólegen bolatynmyn. Biraq olar áli kúnge deıin dezınfeksıa jasamady. Habarlassam, telefonyn kótermeıdi. Qaıda júginerimdi bilmeı otyr edim. Adam kóp júretin oryndarǵa arnaıy kelip otyrǵan jyljymaly mobıldi zań qyzmetiniń keńesteri jaqsy boldy, endi tıisti oryndarǵa jazyp, ózimniń tutynýshy retindegi quqymdy qorǵaıtyn bolamyn.