Qarbyz bir-eki kún kóleminde Reseıge jóneltilmek
Túrkistan oblysy Jetisaı aýdany Atameken aýyldyq okrýgine qarasty Jemisti aýylynda 1 gektar alqaptan 25 tonna qarbyz Reseıge eksporttalýǵa daıyn tur, dep habarlaıdy Almaty-akshamy.kz oblys ákimdiginiń baspasóz qyzmetine silteme jasap.
Qarbyz tamshylatyp sýǵarý ádisimen ósirilgen.
«Tamshylatyp sýǵarýdyń paıdasy mol eken. Jyl saıyn 6 myń túp egetin edim, osy ádispen bıyl 8 myń túp shyqty. Bul óz kezeginde mol ónim alýǵa múmkindik beredi. Tamshylatyp sýǵarýdyń taǵy da bir artyqshylyǵy – tyńaıtqysh 5-6 ese az ketedi. Qol kúshin de kóp qajet etpeısiń. Qarbyzdyń 60-65 kúnde pisetin «Dolbyı» atty sortyn sáýir aıynda ektik. Qazir baǵasyn kelissek, 25 tonnadan astam qarbyzdy úzeıin dep jatyrmyz. Buǵan deıin kelisine 210 teńge usynyp ketti, bul baǵadan 20-30 teńgege joǵarylaý baǵany kózdep otyrmyn», – deıdi «Atymtaı» sharýa qojalyǵynyń tóraǵasy Atymtaı Omarov.
Qarbyz bir-eki kún kóleminde Reseıge jóneltilmek.
Aıta keteıik, bıyl Jetisaı aýdany boıynsha 17 myń gektarǵa baqsha daqyldary egilgen. «Bir alqaptan 2-3 ónim alý» jobasy boıynsha 1100 gektar aýmaqta 236 joba iske asyrylyp jatyr.