2025 jylǵa deıin park 51 ushaqpen tolyqtyrylady.
Ótken jyly elimizdiń áýe kompanıalary 11 mln jolaýshy tasymaldady. Bul týraly Indýstrıa jáne ınfraqurylymdyq damý vıse-mınıstri Almaz Ydyrysov aıtty, dep habarlaıdy Almaty-akshamy.kz QazAqparatqa silteme jasap.
«2022 jyldyń qorytyndysynda azamattyq avıasıa salasyndaǵy qazaqstandyq áýe kompanıalary tasymaldaǵan jolaýshylar sany 2021 jylmen salystyrǵanda 17 paıyzǵa artty. Qazaqstan táýelsizdigi jyldarynyń ishinde alǵash ret tasymaldanǵan jolaýshylar sany 10 mln adamnan asyp, 11 mln-ǵa jetti. Búginde jolaýshylar aǵyny qalpyna keldi jáne turaqty ósim kórsetip otyr», - dedi Almaz Ydyrysov Indýstrıa jáne ınfraqurylymdyq damý mınıstrliginiń keńeıtilgen alqa otyrysynda.
Onyń dereginshe, 109 baǵdar boıynsha 29 elge halyqaralyq áýe reısteri qalpyna keltirildi jáne ashyldy. Aptasyna 479 reıs jasalady. Ushýlardy 3 otandyq jáne 27 sheteldik áýe kompanıasy júzege asyrady.
«Chernogorıa, Malaızıa, Grekıaǵa áýe reısterin jańǵyrtý, Qytaı, Úndistan, Ózbekstanmen reıster jıiligin arttyrý jáne Izraılge, Qatarǵa, Túrkıaǵa, Pákistanǵa, Ázirbaıjanǵa, Tájikstanǵa, Saýd Arabıasyna reıster ashý josparlanyp otyr», - dedi ol.
Vıse-mınıstrdiń dereginshe, áýe kemeleri parkin keńeıtý jumystary da júrgizilip jatyr. 2025 jylǵa deıin park 51 ushaqpen tolyqtyrylady. Onyń 14-i ótken jyly elimizge jetkizildi.