Smaıylov jer telimin berý prosesin tejeıtinderge qatań shara qoldanylatynyn aıtty
Úkimet tabıǵı monopolıserdiń ótinishterin ýaqtyly qaramaǵany úshin ákimshilik jaýapkershilikti engizýdi kózdep otyr. Bul jóninde premer-mınıstr Álıhan Smaıylov Sıfrlandyrý máseleleri jónindegi komısıanyń kezekti otyrysynda aıtty.
"Biz ár óńirdegi jaǵdaıdy jan-jaqty qaraımyz. Eger jańa jyldan bastap adamdarǵa ruqsat berý turyp qalatyn bolsa, óńirlerdegi tıisti jaýapty tulǵalardy jumystan bosatýǵa deıin jaýapqa tartamyz. Biz atalǵan memlekettik qyzmetti ashyq qylyp, sıfrlandyrǵymyz keledi, al bas josparlar men EJJ qazirgi málimetterge sáıkes kelmeıdi. Sondyqtan kóp jaǵdaıda avtomatty túrde ruqsat berilmeı jatady. Biraq, biz keri sheginbeıtinimizdi erekshe atap ótkim keledi. Báribir alǵa júremiz. Bul prosesti tejeıtinderdi jumystan shyǵaramyz. Olardyń ornyna óz qyzmetin laıyqty atqarýǵa bel býǵan adamdardy qoıý kerek", dedi Álıhan Smaıylov
Úkimet basshysy jer qatynastaryn sıfrlandyrý máselesi ınvestısıalyq ahýalǵa, sáıkesinshe, jańa bıznes jobalardy iske qosý men jumys oryndaryn ashýǵa tikeleı qatysty ekenin aıtty. Sondyqtan sıfrlandyrýdyń ekonomıkany odan ári damytý úshin mańyzy zor.
Premer-mınıstrdiń aıtýynsha, taldaý nátıjesinde ákimdikter júktegen sıfrlyq derekterdiń barlyǵy talapqa saı emes ekeni anyqtalǵan. Atap aıtqanda, qoldanystaǵy bas josparlar men egjeı-tegjeıli josparlaý jobalaryna (EJJ) túzetý engizý qajet. Sonymen qatar platformada ótinimderdi ýaqtyly qaramaý jáne negizsiz bas tartý faktileri anyqtaldy.
"Sıfrlandyrýdyń ózi dál osy sybaılas jemqorlyqty azaıtýǵa jáne qate derekter kólemin qysqartýǵa, sáıkes kelmeıtin koordınattar boıynsha jer telimderin berý faktilerin joıýǵa baǵyttalǵan. Bul máselelerdiń barlyǵy sıfrlandyrý nátıjesinde sheshilýi tıis», - dedi".Álıhan Smaıylov
Aıta keterligi, tańdaý, ótinim berý men tirkeýden bastap jer telimderin berýdiń búkil prosesi elektrondy formatqa kóshirildi. Barlyq bıznes-prosester tolyǵymen qaıta qaraldy. Qajetti qadamdar sany birneshe esege azaıtyldy, memlekettik qyzmet kórsetý merzimi shamamen 1 jyldan 30 kúnge deıin qysqardy.
Jalpy, 1 shilde men 28 qarasha aralyǵynda JBMK arqyly 1 mln-nan astam qyzmet kórsetildi, onyń ishinde 238 myń kadastrlyq tólqujat berildi. 25 mln-nan astam anyqtama men málimet qyzmet alýshylardan ótinish bermeı-aq alyndy.