Taldybulaq aýylyndaǵa 100-ge jýyq turǵyn úıde sý, gaz, elektr jaryǵy joq
Almaty oblysynyń Talǵar aýdanyna qarasty Taldybulaq aýylynda 100-ge jýyq turǵyn talaı jyldan beri jerin zańdastyra almaı keledi, dep habarlaıdy Almaty-akshamy.kz Almaty.tv-ge silteme jasap.
Sonyń kesirinen el jaryq pen kógildir gazdan, basqa da memlekettik qyzmetten qaǵylyp otyr. Buqara mundaı olqylyqtyń bárine kezinde ýchaskelerdi satqan aradaǵy deldaldardy kinálaıdy.
O basta nysanaly maqsaty sharýa qojalyǵyn júrgizýge arnalǵan Taldybulaq aýylyndaǵy jerler osydan alty jyl buryn 100 shaqty adamǵa satylǵan. Sol kezde jerdi satyp aqshasyn alǵan adamdar qujatyn rettep beremiz dep eldi sendirip kelgen. Ýádege ılanǵan jurt shama-sharqy kelgenshe qazir úıin salyp tastaǵan. Alaıda halyq áli kúnge deıin qujatyn zańdastyra almaı keledi.
«Basjospardy kórsetti, qolymyzǵa berdi. Araǵak ýaqyt salyp, jer saıajaı aýmaǵynda eken, Vınogradov, Sadovaıa, Vıshnevaıa kóshesi bolatynyn aıtty. Sosyn qaıtadan aýyldyń aımaǵyna qaraıtynyn aıtyp, qujat jasalady dep sendirdi. Alty jyl sozyp keldi», – dedi Taldybulaq aýylynyń turǵyny Nurbolat Jabaǵıev
5 gektardaı jerdiń ıesi - jeke adam. Ýchaske tórt lekke bólinip deldaldar arqyly jurtqa satylǵan. Alaıda olar tyrashtanyp taýyp, jınap bergen aqshamyzdy ıesine tolyq jetkizbegen kórinedi. Turǵyndardyń aıtýysha, el jerin qojaıynynan qaıtadan satyp alýǵa májbúr bolypty.
«Taýyp berem aqshany, jasap berem degenine4 jyl boldy. Men qazir úı de sala almaı otyrmyn. Balalarmen qańǵyryp páter jaldap júrmin. Ne degen sumdyq», – dedi Taldybulaq aýylynyń turǵyny Marjan Erbol.
Turǵyndar qujattyń durys emestigine qaramastan zańsyz úı salyp alǵanyn moıyndaıdy. Biraq alaıaqtardyń arbaýynda túsip, sengenin jasyrmady. Qazir buqara jaryqsyz, jylýsyz otyr. Mektep pen emhanaǵa tirkelý de qıyn.
«Ne balalarymyzdy tirkeýge otyrǵyza almaımyz, ne balalarymyzdy durystap oqytaıyq desek ne jaryq joq, ne gaz joq. Jan-jaǵymyzdakórshilerden elektr toǵyn ýaqytsha jalǵap otyrmyz», – dedi Taldybulaq aýylynyń turǵyny Aınur Núsipbekova.
Jerdi satqandardan eshqandaı qaıyr bolmaıtynyn túsingen halyq aýdan ákimshiligine baryp jerdi qoldaný maqsatyn aýystyryp berýin talap etti. Al ony aýystyrý úshin memleketke jerdiń kadarstrlyq qunyn tóleýi tıis eken. Biraq turǵyndar ol aqshany bólip tóleýdi suraıdy.
«Bul kisiler bári kollektıvno jınalyp, sotqa aryz jazsa, eger sot bólip tóleýge bizdi mindettese, grafık jasap beremiz. Zań bar. Endi biz zańnan asa almaımyz ǵoı», – dedi Talǵar aýdany ákiminiń orynbasary Ermek Tolqynov.
Jerdiń zańdastyrylýy endi sottyń shyǵarǵan sheshimine baılanysty bolmaq. Al eldiń aqshasyn alyp, ýádesin oryndamaǵandardyń atyna oblystyq prokýratýraǵa aryz jazýǵa keńes berildi.