Ult perzentiniń mereıtoıy Almatydaǵy «Alataý» dástúrli óner teatrynda ótti
Memleket jáne qoǵam qaıratkeri, Sosıalısik Eńbek Eri Asanbaı Asqarovtyń týǵanyna bıyl - 100 jyl. Ult perzentiniń mereıtoıy Almatydaǵy «Alataý» dástúrli óner teatrynda atalyp ótti, dep habarlaıdy Almaty-akshamy.kz Almaty.tv-ge silteme jasap.
Biliktilik pen zıalylyq, tazalyq pen adaldyq jáne halqyn sheksiz súıý. Eli úshin aıanbaı eńbek etken Asanbaı Asqarov jaqsy basshy bolý úshin adamda osy úsh qasıettiń bolýy shart degen. Danalyǵymen daralanǵan ol jumysta da osy qaǵıdany ustanyp, qyzmetkerlerinen osyny talap etetin. Alash amanatynyń Asanbaıy atanǵan tulǵanyń mereıtoıyn Almaty qalasynda atap ótilýi de beker emes. Ol el basqarǵan tusta eń aýqymdy degen qurylys megapolıste salynǵan edi.
«Qazaqstan qonaq úıi, Respýblıka saraıy, Oqýshylar saraıy, sonymen qatar, qazirgi stadıon qaıta jańǵyrtyldy. 1973 jyly Medeý muz aıdyny jańǵyrtyldy. Ideıasy Qonaevtyki, iske asyrǵan osy Asanbaı Asqarov boldy», – dedi jazýshy Muhtar Qazybek.
Asanbaı Asqarov tek saıasat sahnasynda ǵana emes, ádebıet áleminde de ózindik qoltańbasyn qaldyryp ketti. Ómiriniń sońǵy jyldary ol qarasózge den qoıdy. «Taǵdyr», «Jumaq pen tozaq jyrlary», «Kózqaras», «Uly Turannyń uldary» kitaptary búginge deıin jetip, urpaqqa amanat bolyp qaldy. Kórnekti memleket jáne qoǵam qaıratkerin eske alýǵa arnalǵan keshte jastar onyń shyǵarmalarynan úzindi oqydy.
«Asanbaı aǵanyń keremet sózi bar edi. Ómir darıasynda ár adamnyń laıyqty orny bar. Búgin Asekeń laıyqty ornyn tapty. Ol kisi alǵyr, qandaı másele bolsa da týra aıtatyn», – dedi A. Asqarovtyń zamandasy Raýshanbek Qyrǵyzbaı.
Ult janashyry Asanbaı Asqarov «Jeltoqsan kóterilisin uıymdastyrýǵa qatysty, ultshyl» degen aıyppen 4 jyldan asa ýaqyt qamaýda boldy. Ol Máskeýdiń Býtyrka, Motroskaıa tıshına sekildi túrmelerinde aýyr azap shekti.
«Biz qaı kezde bolmasyn, bireýdi jamandaımyz. Sol kezde aryz jazyp, búkil sharýasyn joqqa shyǵarǵysy kelgen azamattar boldy. Qazaqta «Taý alystaǵan saıyn, bıikteı beredi» degen sóz bar. Ýaqyt ótken saıyn, onyń kim ekeni, orny bilip jatyr», – dedi Memleket jáne qoǵam qaıratkeri Amalbek Tshanov.
1991 jyly Asanbaı Asqarovqa taǵylǵan aıyptyń múlde negizsiz ekeni anyqtalyp, aqtalyp shyqty. Shymkent qalasynda onyń eskertkishi men murajaıy bar. Óziniń adaldyǵymen, bıik paıym-parasatymen el esinde qalǵan qaıratkerdi halqy qashanda ulyqtaı bermek. Qandaı zaman bolsa da, qansha ýaqyt ótse de alyptar alasarmaıdy. Olardyń asqaq tulǵasy bıikteı beredi.