Bıylǵy 20 qańtardaǵy málimet boıynsha, elimizde 120 ardager men jeńiske úles qosqan 42 545 azamat turady.
Olardyń ishinde:
- qorshaýdaǵy Lenıngrad turǵyndary – 67 adam;
- konslagerlerdiń burynǵy kámeletke tolmaǵan tutqyndary – 139 adam;
- Soǵys kezinde alǵan jaralanýy, kontýzıasy, zaqymdanýy nemese aýrýy saldarynan múgedektigi bar qaıtys bolǵan adamnyń jubaılary – 743 adam;
- Soǵysta qaza tapqan (qaıtys bolǵan, habar-osharsyz ketken) jaýyngerlerdiń jesirleri – 2 adam;
- tyl eńbekkerleri – 41 594 adam.
Eńbek jáne halyqty áleýmettik qorǵaý mınıstrligi ardagerler men tyl eńbekkerlerine qamqorlyq jasaý, olardyń ómir súrý sapasyn arttyrý – memlekettiń áleýmettik saıasatynyń basty basymdyqtarynyń biri ekenin atap ótti. Qarttardy áleýmettik qorǵaý sharalary ortalyq deńgeıde de, jergilikti deńgeıde de júzege asyrylady.
Birinshiden, zeınetaqy jáne ózge de áleýmettik tólemderdiń mólsheri jyl saıyn artyp keledi. Azamattardyń 19 sanatyna (soǵysqa qatysýshylar, tyl eńbekkerleri, aqtalǵan azamattar jáne t.b.) ózge de áleýmettik tólemderge qaramastan arnaýly memlekettik járdemaqy tóleý júzege asyrylady.
Ekinshiden, ardagerlerdi áleýmettik qoldaýdyń qosymsha sharalary kórsetiledi. Olardyń barlyǵy áskerı qyzmetshilerge kórsetiletin quqyqtar men kepildikterge ıe. Salyq salý boıynsha jeńildikterdi paıdalanady, olarǵa Astana jáne Almaty qalalaryndaǵy mamandandyrylǵan gospıtáldarda bilikti medısınalyq kómek kórsetiledi, sanatorıı-kýrorttyq emdeý usynylady.
Úshinshiden, ardagerlerge birjolǵy materıaldyq kómek berý jyl saıynǵy dástúrge aınaldy.
"Oblystardyń, astananyń jáne respýblıkalyq mańyzy bar qalalardyń jergilikti atqarýshy organdarynyń aqparaty boıynsha Jeńis kúniniń 80 jyldyǵyn merekeleý qurmetine bıyl 120 ardagerdiń árqaısysyna 5 mln teńgeden birjolǵy materıaldyq kómek kórsetiledi", - delingen vedomstvonyń baspasóz qyzmeti taratqan habarlamada.