Qazaqstan Respýblıkasynyń Ulttyq ulanyna qarasty «Ońtústik» óńirlik qolbasshylyǵynyń áskerı bólimderinde Uly Otan soǵysyndaǵy Jeńistiń 80 jyldyǵyna arnalǵan «Jeńiske 100 kún qalǵanda» aksıasy bastaldy, dep habarlaıdy aqshamnews.kz
İs-shara jastardy otansúıgishtikke tárbıeleýge, ardagerlerdi qurmetteýge, Uly Otan soǵysyna qatysýshylardyń batyrlyǵyn nasıhattaýǵa, batyldyq pen janqıarlyqtyń qundylyǵyn, sondaı-aq Otandy qorǵaý boryshynyń qasıettiligin jáne urpaqtardyń tarıhı sabaqtastyǵyn tereń túsinýge baǵyttalǵan.
Keńes Odaǵynyń batyry, gvardıa polkovnıgi Baýyrjan Momyshuly atyndaǵy 5571 áskerı bóliminiń áskerı qyzmetshileri bul ıgi bastamany 28 gvardıalyq-panfılovshylar saıabaǵyndaǵy máńgilik alaýǵa gúl shoqtaryn qoıýdan bastady. Bólimniń áskerı orkestri saıabaqtaǵy Dańq memorıaly aldynda soǵys jyldaryndaǵy ánder men mýzykalardy oryndady.
100 kún boıy ótetin mańyzdy shara aıasynda Uly Otan soǵysynyń ardagerleri men tyl eńbekkerlerine qoldaý jáne qaıyrymdylyq kómek kórsetý aksıalary, áskerı qyzmetshiler men Ulttyq ulan ardagerleriniń qatysýymen bilim berý uıymdaryndaǵy erlik sabaqtary, áskerı bólimderde «Ashyq esik kúnderi», jastar arasynda patrıottyq chelendjder uıymdastyrylady. Sondaı-aq ardagerdiń úıiniń aldynda áskerı orkestr soǵys jyldaryndaǵy ánder men mýzykalardy oryndaıdy, Qazaqstan Respýblıkasy Ulttyq ulanynyń áskerı qyzmetshileri saltanatty sherýmen ótip, ardagerge áskerı sálem beredi.
Aksıa «9 mamyr – Uly Jeńistiń 80 jyldyǵy» merekesimen qorytyndylanady.