Jeneva konservatorıasynyń konsert zalynda «Turan» etno-folklorlyq ansambliniń, tenor Medet Shotabaevtyń jáne «Roza Baǵlanova atyndaǵy Qazaqkonsert» uıymy mýzykanttarynyń «Bridge of Times» konserti ótti.
Jenevada ornalasqan BUU bólimshesi janyndaǵy Qazaqstannyń Turaqty ókildigi bul jobany «Qazaqkonsert» ónerpazdarymen birlesip, olardyń álemdik týrnesi aıasynda jenevalyq La Haute École de musique de Genève, le Centre d'Accueil de la Genève Internationale (CAGI) jáne les Ateliers d'ethnomusicologie (ADEM) qoldaýymen júzege asyrdy. Bul jergilikti aýdıtorıaǵa baǵyttalǵan sońǵy ýaqyttaǵy eń iri mádenı is-shara boldy, dep habarlaıdy Almaty-akshamy.kz Elorda.info-ǵa silteme jasap.
«Turan» etno-folklorlyq ansambli qazaq halqynyń ózindik mýzykalyq ónerin, kóne aspaptardyń dybysyn jáne kómeı án ónerin jańǵyrtýǵa umtylyp keledi. Qobyz, jetigen, sherter, orteke, sybyzǵy jáne taǵy basqa 30-dan astam ulttyq mýzykalyq aspapta óner kórsetken qazaqstandyqtardy kórermen jyly qarsy aldy.
Sonymen qatar aýdıtorıa halyqaralyq baıqaýlardyń laýreaty, Qazaqstannyń eńbek sińirgen qaıratkeri, tenor Medet Shotabaevty ystyq yqylaspen qabyldady.
Ulttyq jáne klasıkalyq mýzyka aspaptary úshin jazylǵan jáne Qazaqstannyń eńbek sińirgen qaıratkeri, kompozıtor Aqtoty Raıymqulovamen birge oryndalǵan kompozısıalardyń oryndalýy keshtiń sharyqtaý shegine aınaldy.
Anshlagpen ótken konserttiń sońynda qonaqtarǵa ulttyq taǵamdar usynyldy.