Keńes áskerleriniń aýǵan dalasynan shyǵarylǵanyna – 34 jyl
Almatydaǵy 28 panfılovshylar saıabaǵynda 15 aqpan – Keńes áskerleriniń Aýǵan dalasynan shyǵarylǵanyna 34 jyl tolýyna arnalǵan saltanatty jıyn ótti. Saltanatty jıynǵa Uly Otan soǵysynyń ardagerleri, aýǵan soǵysynyń ardagerleri, qalalyq ardagerler keńesiniń músheleri men qala jurtshylyǵy qatysty.
Saltanatty jıyn aýǵan soǵysynda erlikpen qaza tapqan bozdaqtardy bir sát únsiz eske alýmen bastaldy. Alǵashqy sóz kezegin Almaty óńirlik gornızon basshysynyń orynbasary, polkovnık Asqar Ahmetbekov aldy.
– 1979 jyldyń 25 jeltoqsanynda bastalyp, 1989 jyldyń 15 aqpanyna deıin sozylǵan soǵysqa KSRO aýmaǵynan 620 myńnan astam jaýynger men ofıser qatysqan edi. Osy soǵysta Keńes Odaǵynan 15 myń 51 adam oqqa ushty. Qazaqstannan barǵan 22 myń 269 jaýyngerdiń 924-i soǵys dalasynda erlikpen qaza tapty. Elge 1015 jap-jas bozbala kemtar bolyp oraldy. Soǵys dalasynda 21 soldat iz-túzsiz ketti. Osynaý 110 aıǵa sozylǵan soǵystan elge aman-esen oralǵan jaýyngerlerdiń kóńilderi jaraly. Olar únemi maıdanda oqqa ushqan joldastaryn oılaıdy. Olardyń esimderi jadymyzda saqtaýly. Olardyń jasaǵan erlikteri eldiń esinde, – dedi ol.
Qalalyq ákimshilik atynan sóz alǵan Baýyrjan Jaýbasov aýǵan soǵysyna qatysqan jaýyngerlerdiń kórsetken janqıarlyq erlikteri jas urpaqqa qashanda úlgi bolatynyna toqtaldy. Ol jastardy otansúıgishtik rýhta tárbıeleýge qosyp otyrǵan úlesteri úshin rızashylyǵyn bildirdi.
Qalalyq ardagerler keńesiniń tóraǵasy Aqan Bıjanov, aýǵan soǵysyna qatysqan jaýyngerler jastarǵa tárbıe berip, memleketimizdiń turaqtylyǵy jolynda eńbek etip jatqany jóninde baıandady. Aýǵan soǵysy ardagerleri men múgedekteri keńesi tóraǵasynyń orynbasary Baıkal Hamzın mundaı is-sharanyń jastarǵa beretin úlgisi týraly aıtyp, soǵysta qaza tapqandarǵa kórsetilgen qurmettiń erlikke kórsetilgen qurmet ekenin jetkizdi. Saltanatty jıyn barysynda ardagerler sóz alyp, elimizdegi beıbit ómirdiń baıandy bolýyn tiledi.
Saltanatty jıyn sońynda Máńgilik alaý men aýǵan soǵysyna qatysýshylarǵa arnalǵan eskertkishke gúl shoqtary qoıyldy. Jınalǵandar «Áskerler úıinde» ótken konserttik baǵdarlamany tamashalady.