Nepalda áleýmettik jelilerdi buǵattaý jappaı qarsylyqqa ulasyp, qaqtyǵystar kezinde kemi 22 adam qaza taýyp, myńnan asa adam jaralandy degen derek tarady. Bılik buǵattaý áreketterin toqtatty jáne premer-mınıstr Sharma Olı otstavkaǵa ótinish berdi. Degenmen narazylyqtar komendant saǵatqa qaramastan jalǵasyp jatyr. Bul týraly Reýter agenttigi habarlady. Dál qazir Nepalda ne bolyp jatyr Aqshamnews.kz tilshisiniń hronologıalyq materıalynan bilińiz.
Bári neden bastaldy?
Úkimet Facebook, Instagram, YouTube, X (Twitter), WhatsApp, Reddit, LinkedIn sekildi platformalardy "tirkeý talaptaryn oryndamady" dep shektep tastady. Bul sheshimdi halyq sóz bostandyǵyn shekteý retinde qabyldap, jastar kóshege narazylyqqa shyqty.
sýret: Adnan Abidi / Reuters
8 qyrkúıekte qaqtyǵystar ýshyǵyp, alǵashqy qurbandar tirkeldi
Narazylyq bildirýshiler sherýge "Z urpaǵy narazylyqtary" dep ataý berip, elde jappaı tártipsizdikter bastaldy. Bundaı ataý kópshiliginiń jasyna baılanysty qoıylǵan. Ashýly top tipti qarjy mınıstrin sheshindirip, ózennen jalańash ótkizgen. Onymen qosa úkimetiniń keńsesi ornalasqan 100 jyldan asa tarıhy bar Katmandý qalasyndaǵy Sıngha Dýrbar saraıyn órtep jiberdi.
Katmandý men ózge qalalarda polısıa parlamentke basyp kirýge talpynǵan topty kóz jasartatyn gazben jáne rezeńke oqpen taratty. Narazylar parlament aldyndaǵy qorshaýlardy buzyp, birneshe saıasatkerdiń rezıdensıasyna ot qoıdy. Sol kúni qaza tapqandar týraly alǵashqy aqparattar shyqty. Nátıjesinde eki kún ishinde jappaı tártipsizdikten 22 adam qaza taýyp, 400-den astam adam jaralandy.
sýret: Reuters
Bılik shegindi, premer otstavkaǵa ketti
Baılanys jáne sıfrlyq tehnologıalar mınıstri "Áleýmettik jelilerdi buǵattaýdy toqtattyq, olar jumys istep tur" dep habarlady. Sol kúni premer-mınıstr Sharma Olı qyzmetinen ketýge ótinish berdi. Biraq bul sheshim de tolqýdy basa almady. Sherýshiler júıelik reformalardy jáne bıliktiń esep berýin talap etip jatyr.
Qazirgi ahýal qandaı?
Katmandýda kommendant saǵaty engizildi. Soǵan qaramastan, jastardyń bastamasymen ótken mıtıńiler tolastamaı tur: parlament pen sheneýnikter rezıdensıalary mańynda urandar aıtylyp, qaýipsizdik sharalary kúsheıtildi. Bılik pen narazylyq ókilderi dıalogqa kelmeıinshe, ahýaldyń turaqtalýy ekitalaı degen boljam aıtylyp jatyr.
sýret: Reuters