«Mýsorgı» jobasy jurtty tańqaldyrdy
Qala turǵyndary kóbirek jınalatyn, ásirese jastardyń alańyna aınalǵan Arbat búgin, 24 qyrkúıek kúni qoqysqa tolyp ketti. Qoqystardy jamylǵan «qubyjyqtar» Arbat boıymen sherýletip qala turǵyndarynyń nazaryn ózine aýdardy dep habarlaıdy almaty-akshamy.kz.
Anyǵynda bul ár saladaǵy eko-belsendiler uıymdastyrǵan eko-art joba bolatyn. 8 sýretshi jetekshi men olardyń komandasy qaladaǵy ár aýdannyń ekologıalyq jaǵdaıyn zerttep, jınalǵan qoqystardan qubyjyq keıipkerlerdi jasap sherý ótkizdi.
Sherýshilerdiń tizbegin bastap qarshadaı ǵana bala ala baıraǵyn bulǵap júrdi. Ústine áppaq qardaı kıim kıgen. Onyń artynan qalmaı qýalaǵan «Qoqys-bıke Munaıqyzy» aq qardy qýalaǵan qoqystar tizbegin bastaǵan. Oǵan ilesken «qubyjyqtar» el nazaryn aýdarmaı qalǵan joq. Alqam-salqam «mýtanttar» maqsaty da sol edi – almatylyqtardy ekologıalyq ortaǵa jáne qoqystarǵa nazaryn aýdarý.
Qatysýshylardyń biri Móldir Saǵyndyq bul sherýdiń mánin bylaı dep túsindirdi: «Bul «Mýsorgı» dep atalatyn joba. Elimizde birinshi ret ótip otyr. Qalanyń ár aýdandaryna bólinip ondaǵy ekologıalyq jaǵdaıdy zertteýge tyrystyq, eki aptadaı ýaqyt jumsap lastaný jaǵdaıyn baǵaladyq, sýretter men derekterdi toptastyrdyq. Aıtalyq, bizdiń top Bostandyq aýdanynda boldyq, onda biz muzdyqtardyń erýi, jylyný syndy jaǵdaılar boıynsha zertteý júrgizdik. Al búgin biz sonda jınalǵan qoqystardan osyndaı qubyjyq keıipkerler jasap, sherýletip qala turǵyndarynyń nazaryn ekologıanyń mańyzyna burǵymyz keldi». Móldirdiń aıtýynsha, bul jobaǵa túrli salanyń adamdary toptasqan. Olardyń arasynda sýretshiler, qalamgerler, mýzykanttar, medısına qyzmetkerleri, oqytýshy ustazdar da bar.
«Árıne, tań qaldym. Ekologıa máselesi boıynsha shara ekenin birden túsindim. Qoqystardyń, lastanýdyń adam men planetamyzǵa tıgizip jatqan áserin jetkizgisi kelgenin túsindim. Bul rasynda mańyzdy másele dep oılaımyn. Biraq, qoǵamǵa tereńirek áser etý úshin jalǵyz bul shara jetkiliksiz», – deıdi qala turǵyny Arman.
Joba qatysýshylarynyń eki aptalyq eńbeginiń nátıjesinde jınalǵan derekter men fotosýretterdiń, sondaı-aq, jaraqsyzdardan jasalǵan óner týyndylarynyń kórmesi Arbat mańyndaǵy Dump Gallery-de 30 qyrkúıek pen 8 qazan arasynda ótedi. Joba jetekshileri almatylyqtardy ekologıa máselesine nazar aýdarýǵa shaqyrady.