«Jeke tulǵalardyń bankrottyǵy» týraly zańdy asyǵa kútip otyrǵandar kóp. Biraq bul múmkindikti jaýapkershilikten jaltarý dep túsinbeý kerek.
Qazaqstan qarjygerleri qaýymdastyǵynyń keńes tóraǵasy Elena Bahmýtova birqatar táýekeldi jiktep berdi. Elde jyldan-jylǵa tutynýshylyq nesıeleý úlesi artyp keledi. Bes jyl buryn bul kórsetkish 19 prosentke teń bolsa, byltyr 33 prosentten asqan, dep habarlaıdy Almaty-akshamy.kz
Elena Bahmýtovanyń sózinshe, eldegi boryshkerlerdiń 20 prosentke jýyǵy nesıe óteý ýaqytyn 3 aıdan asyryp jibergen. Ásirese, 300 myń teńgege deıingi qaryzy barlar tyǵyryqqa tirelipti. Iaǵnı osyndaı nesıe alǵandardyń teń jartysy bul. Degenmen, ekonomıs halyqaralyq standartpen sabaqtasaq, bizdegi jaǵdaıdyń aıtarlyqtaı kúrdeli emestigin eskertti. Biraq sheshim qabyldarda ortasha esepti emes, naqty ahýaldy baǵamdaý mańyzdy deıdi.
Bul úshin nesıeleýge monıtorıń júrgizý qajet. Elena Bahmýtovanyń aıtýynsha, zańdy ázirleýde "zańdy tulǵalardyń bankrottyǵy" týraly qujatty qaperge alǵan jón. Al bankrottyqty sot sheshýi kerek. Óıtkeni zań talabyna ilikken azamat memlekettik qyzmetpen aınalysa almaıdy, kásip bastaý múmkindigi de joq. Sol sebepti "Jeke tulǵalardyń bankrottyǵy" týraly zań arqyly nesıesin tóleýge múlde jaǵdaıy kelmeıtin azamattarǵa ǵana járdemdesý kerek. Áıtpese, tutynýshylyq qaryz mólsherlemesi barlyq azamat úshin qymbatqa túsedi.
- Adamdar shyǵyndaryn nesıe arqyly óteýdi ádetke aınaldyrdy. Biraq munyń arty jaqsylyqqa aparmaıdy. Memlekettiń sol qaryzdy keshirýi, bankrottyq jarıalaýy oń sheshim emes. Eń aldymen, azamattarǵa kirisin arttyrýǵa járdemdesý kerek. Bul úshin keshendi jospar qurý qajet sıaqty. Jumyssyzdyqty azaıtý mańyzdy, - deıdi Qazaqstan qarjygerleri qaýymdastyǵynyń keńes tóraǵasy Elena Bahmýtova.