Halyqtyń kóbi mashaqatynan qashyp, qujatyn aýystyrǵysy kelmeıdi.
Azamattardyń týý týraly kýáliginde aty-jóni durys jazylmaǵandyqtan, barlyq qujatynda qate bolady, qazir munyń bárin túzetýge múmkindik bar, dep habarlaıdy Almaty-akshamy.kz
Neden bastaý kerek?
Aldymen týý týraly kýálikti túzetý kerek.
Barlyq jeke qujat týý týraly kýáliktiń negizinde beriledi. Sondyqtan aldymen sony túzetip alý kerek. Búginde bul rásim barynsha jeńildetilgen.
«Týý týraly kýálikke túzetý engizý úshin nemese jeke málimetti aýystyrý úshin, elektrondy úkimet portaly arqyly ótinish jiberýge bolady. Halyqqa qyzmet kórsetý ortalyǵy da ótinish qabyldaıdy. Sosyn turǵylyqty jeri boıynsha azamattyq hal aktilerin tirkeý bólimine baryp, barlyq qujatty tapsyrý qajet», - deıdi mamandar.
Ótinishpen birge qate jazylǵan qujattar da tapsyrylady. Sondaı-aq 0,5 aılyq eseptik kórsetkish (1 750 teńge) kóleminde memlekettik baj salyǵyn tóleý kerek. Barlyǵy durys bolsa, jańadan týý týraly kýálik beriledi.
18 jasqa deıingi balanyń qujatynda qate bolsa, ótinishti ata-anasy, asyrap alýshylar nemese qamqorshylar berýi tıis.
Kýálikten «ov-ev»-ter qalaı alynady?
Qazaqstanda 1996 jyly kýáliktegi adamnyń aty-jóni, tegi men ákesiniń atyn qazaqsha jazýǵa ruqsat berildi. Sol kezde qabyldanǵan jarlyqqa sáıkes, ulty qazaq azamattar tegi men ákesiniń atyndaǵy qazaq tiline tán emes affıksti alyp tastaýǵa quqyly. Alaıda tegi men ákesiniń atynyń túbirlik negizi saqtalýǵa tıis. Osylaısha, «ov-ev» sıaqty oryssha jurnaqty alyp tastap, ákesiniń atyn jazǵan kezde azamattyń jynysyna qaraı «uly» nemese «qyzy» sózderin qosyp jiberýge bolady.
E-gov portalynda kórsetilgen málimetke sáıkes, tekti qazaqsha jazý rásimi ózgertý, tolyqtyrý nemese túzetýge jatpaıdy. Sondyqtan akt jazbasyna túzetý engizilmeıdi. Halyqqa qyzmet kórsetý ortalyǵyna birden ótinishpen júginýge bolady. Jeke kýálikti aýystyrý kezinde ulttyq-tarıhı dástúrlerdi negizgi sebep retinde kórsetken jón. Al balanyń qujatyna ózgeris engizilse, HQKO-ǵa nemese AHAJ bólimine qazaq tildi translıterasıasymen qaıtadan týý týraly kýálikke ótinish jazý qajet.
Keı kezde mamandar ótinish bergen adamnyń aty-jóni qazaq tilinde qalaı durys jazylatynyn ózdiginen anyqtaı almaıdy. Ondaıda Til bilimi ınstıtýtynan anyqtama alýǵa bolady. Ony da azamattyq hal aktilerin tirkeý bólimine aparý kerek. Ótinish bes kúnniń ishinde qaralady.