Bul týraly Densaýlyq saqtaý mınıstri Ajar Ǵınıat málimdedi.
Qazaqstanda "jedel járdem" qyzmetinde isteıtin júrgizýshilerdiń jalaqysyn kóterý úshin «paramedık» mamandyǵy engiziledi, dep habarlaıdy Almaty-akshamy.kz
Májiliste ótken Úkimet saǵatynda depýtat Edil Jańbyrshın jedel medısınalyq járdem qyzmetkerleriniń jalaqy problemasyn kóterdi. Ol jýyrda Mańǵystaý oblysynda "jedel járdem" qyzmetkerleri narazylyq aksıasyna shyǵyp, eńbekaqyny kóterýdi talap etkenin eske saldy.
«Máselen, Mańǵystaý oblysynda ortasha jalaqy – 414 myń teńge. Al ortasha medpersonaldyń jalaqysy – 190 myń teńge, júrgizýshiler men kishi medpersonal bar bolǵany 102 myń teńge alady. Qysy-jazy kúni-túni jumys isteıtin medısına salasynyń aldyńǵy qatarly jaýyngerleriniń osyndaı jalaqy alýy ádiletsizdik dep sanaımyn», - dedi májilismen.
Osyǵan baılanysty Jańbyrshın Densaýlyq saqtaý mınıstrinen "jedel járdem" mamandarynyń jalaqysyn kóterý úshin qandaı sharalar qabyldanatynyn surady.
Ajar Ǵınıat "jedel járdem" júrgizýshileriniń aılyǵy 100 myń teńgeden sál asatynyn rastady.
Aıtýynsha, "jedel járdem" júrgizýshileriniń aılyǵyn ósirý úshin «paramedık» mamandyǵyn engizý josparda bar.
«Júrgizýshi emes, «paramedık» degen mamandyq engizý kerek degen usynys bar. "Jedel járdem" kóliginde otyrǵan júrgizýshi de sol shuǵyl brıgadanyń quramyna kiredi ǵoı. Olar «paramedık» degen mamandyq alsa, jalaqysyn kótere alamyz dep josparlap otyrmyz. Sondyqtan zań júzinde qazir osyndaı uǵym engizip jatyrmyz. Paramedık degen kim, onyń jalaqysy qansha bolýy kerek, bári pysyqtalady. Sóıtip, biz júrgizýshilerdiń jalaqysyn 20% bylaı tursyn, odan da joǵary kóterýge múmkindik beremiz», - dep túsindirdi Ǵınıat.
Mınıstr Prezıdenttiń tapsyrmasymen dárigerlerdiń jalaqysy jyl saıyn 30%-ǵa, ortasha medısına qyzmetkerleriniki 20%-ǵa, al bıyldan bastap medısınalyq qyzmetker emes, biraq medısınalyq uıymdarda isteıtin qyzmetkerlerdiń aılyǵy 20%-ǵa ósip jatqanyn atap ótti.
Bıyl dárigerlerdiń ortasha jalaqysy – 420 myń, orta medısına qyzmetkerleriniń aılyǵy – 250 myń, al osy salada istep júrgen medısına qyzmetkeri emes mamandardyń jalaqysy 120 myń teńgeni quraıdy.