Qazaqstan Respýblıkasy Densaýlyq saqtaý mınıstrligi Astana qalasynyń ákimdigimen jáne Yandex Qazaqstan kompanıasymen birlesip, elorda turǵyndarynyń shaqyrylǵan jedel járdem brıgadasynyń qozǵalysyn naqty ýaqyt rejıminde qadaǵalaýǵa múmkindik beretin jańa sıfrlyq servısti engizý boıynsha pılottyq jobanyń iske qosylǵanyn habarlaıdy.
Jedeldiktiń birinshi sanaty boıynsha shaqyrtý túsken jaǵdaıda, júıe ótinish berýshige avtomatty túrde ınteraktıvti kartaǵa siltemesi bar SMS-habarlama jiberedi. Kartany braýzer arqyly ashqan paıdalanýshy jedel járdem kóliginiń baǵytyn naqty ýaqytta baqylaı alady.
Bul sheshim shuǵyl qyzmetterdiń jumysyn ashyq etýge, azamattardyń alańdaýshylyǵyn azaıtýǵa, sondaı-aq dıspecherlerge túsetin júktemeni tómendetýge baǵyttalǵan.
Astana qalasy jedel járdem qyzmetiniń málimetinshe, operatorlar kún saıyn 6000-ǵa deıin kiris qońyraý qabyldaıdy, olardyń 40%-ǵa jýyǵy — jedel járdemniń kelý ýaqytyn naqtylaýǵa baılanysty qaıtalama qońyraýlar.
Avtomattandyrylǵan habarlandyrý júıesin engizý osyndaı qońyraýlardyń sanyn aıtarlyqtaı azaıtyp, resýrstardy jańa shuǵyl shaqyrtýlardy óńdeýge jumyldyrýǵa múmkindik beredi.
Joba alǵashqy kezeńde Astana qalasynda jedeldiktiń birinshi sanaty boıynsha keıbir shaqyrtýlarǵa qoljetimdi bolady. Aldaǵy ýaqytta bul jobany Qazaqstan aýmaǵyndaǵy barlyq shuǵyl shaqyrtýlarǵa keńeıtý josparlanýda.
«Jedel járdem brıgadasynyń qozǵalysyn kórý múmkindigi — tehnologıalar arqyly ashyqtyqty qamtamasyz etý, shaqyrǵan adamdardyń alańdaýshylyǵyn azaıtý jáne dıspecherlerge túsetin júktemeni azaıtýdyń bir mysaly. Sonymen qatar, sıfrlyq habarlama berý brıgadanyń kelýine daıyndalýǵa kómektesedi, mysaly, aýladaǵy shlagbaýmdy ashý nemese pasıenttiń qujattaryn daıyndaý sekildi», — dedi QR Densaýlyq saqtaý vıse-mınıstri Erbol Ospanov.
Densaýlyq saqtaý mınıstrligi eldiń barlyq azamattary úshin medısınalyq kómektiń sapasyn, qoljetimdiligin jáne jedeldigin arttyrý maqsatynda densaýlyq saqtaý júıesine sıfrlyq sheshimderdi engizýdi jalǵastyrady.
Fýnksıa API Iandeks Kartanyń JavaScript API sheshimi arqyly júzege asyrylǵan.