Bul týraly Qazaqstan Prezıdenti Qasym-Jomart Toqaev Qazaqstan polısıasynyń 30 jyldyǵyna arnalǵan saltanatty jıynda aıtty.
1 qazannan bastap jedel izdestirý qyzmeti qyzmetkerleriniń eńbekaqysy kóteriledi, dep habarlaıdy Almaty-akshamy.kz.
«Biz tártip saqshylaryn qoldaýǵa árdaıym erekshe kóńil bólemiz. Keıingi jyldary polısıa qyzmetkerleriniń jalaqysy birneshe ret ósip, turǵyn úıdi jalǵa alý qunyna ótemaqy tóleý engizildi. Sonymen qatar ákimderge jergilikti búdjet esebinen qarjylandyrylatyn qyzmetterge 30 paıyzdyq ústemaqy belgileý quqyǵy berildi. Meniń tapsyrmama sáıkes bıylǵy 1 qazannan bastap jedel izdestirý qyzmeti qyzmetkerleriniń eńbekaqysy kóteriledi. Biz polısıa qyzmetkerlerin quqyqtyq jáne áleýmettik turǵydan qorǵaýdy jaqsartý úshin keshendi sharalardy jalǵastyramyz», – dedi Memleket basshysy.
Prezıdent quqyq qorǵaý organdarynda qyzmet atqarýdyń jastar úshin tartymdy ári mártebeli bolýy mańyzdy dep esepteıdi. Úzdik polıseılerdi kótermelep, erekshelep, marapattaý isin qoldaıtynyn bildirdi. Sondaı-aq quqyq qorǵaý organdaryndaǵy qyzmet tek artyqshylyq pen abyroı ǵana emes, halyq aldyndaǵy úlken jaýapkershilik ekenin túsiný kerek dep atap ótti.
Qasym-Jomart Toqaev İshki ister mınıstrligi kadrlyq áleýetti udaıy jetildirýdi, qyzmetkerlerdiń kásibı biliktiligin jáne moraldyq rýhyn nyǵaıtýdy qamtamasyz etýi qajet ekenin aıtty. Qazaqstan polısıasynda otansúıgishtiktiń, ashyqtyqtyń, árqashan adamdarǵa kómekke kelýge daıyn turatyn adaldyqtyń obrazy qalyptasýy kerek. Bul barlyq tártip saqshylarynyń oılaý júıesi men minez-qulqyna túbegeıli ózgerister engizýdi talap etedi.