Olar alys-jaqyn shetelderden kelgen.
Qazaqstanda eki myńǵa jýyq shetel jumys kúshin paıdalanatyn jumys berýshi bar. Búgingi tańda elimizde 16 myńnan astam shetel azamaty jumys isteıdi, dep habarlaıdy Almaty-akshamy.kz.
«2022 jylǵy 1 maýsymdaǵy jaǵdaı boıynsha, jergilikti atqarýshy organdardyń ruqsatymen Qazaqstan aýmaǵynda 16 424 shetel azamaty eńbek etedi», - delingen Eńbekmıni baspasóz qyzmetiniń habarlamasynda.
Shetelden jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 617 ruqsat (birinshi sanat), qurylymdyq bólimshelerdiń basshylary úshin 3 224 ruqsat (ekinshi sanat). Tartylǵan SHJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 8 020 jáne 926 adam. Sondaı-aq maýsymdyq jumystarǵa 1 506 adam, al korporatıvtik aýystyrý aıasynda 2 131 adam tartyldy.
Qazirgi ýaqytta Qazaqstanda SHJK paıdalanatyn 1 762 jumys berýshi bar. Olarda 398 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96%-y.
Eńbek mıgranttary keletin negizgi elder: Qytaı – 3 651 adam, Túrkıa – 1 853 adam, Ózbekstan – 1 605 adam, Úndistan – 1 577 adam, Ulybrıtanıa – 1 113 adam.
İshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. Osy jylǵy qańtarda iri otandyq bıznes ókilderimen kezdesý qorytyndysy boıynsha Memleket basshysynyń bergen tapsyrmasyn oryndaý úshin mınıstrlik shetel jumys kúshin tartýǵa arnalǵan kvotany buryn josparlanǵan 28 352 birlikten 23 560 birlikke deıin, ıaǵnı 4 792 adamǵa (16%) qysqartty.