Ázirbaıjan baspasynda basyldy
Qazaq detektıv janrynyń kórnekti ókili, áıgili jazýshy Kemel Toqaevtyń «Nochnoı vystrel» atty jınaǵy ázirbaıjandyq «Ganýn» baspasynan jaryq kórdi, dep habarlaıdy Almaty-akshamy.kz BAQ.KZ-ke silteme jasap.
Agenttiktiń habarlaýynsha, kitapty ázirbaıjan tiline jazýshy-aýdarmashy Narıman Abdýlrahmanly aýdarǵan. Kitaptyń resenzenti – fılologıa ǵylymdarynyń doktory, profesor Badırhan Ahmedlı, redaktory – Mahır Garaev.
Kitaptyń alǵysózin detektıv janrynda jazylǵan shyǵarmalardyń tanymal avtory, Ázirbaıjan Jazýshylar Odaǵynyń birinshi hatshysy, Kemel Toqaevtyń shyǵarmalarymen etene tanys halyq jazýshysy Chıngız Abdýllaev jazdy.
Onyń «Qasıetti paryz» atty bóliminde Kemel Toqaevtyń shyǵarmashylyǵyna aýqymdy ári dál baǵa berilgen jáne sheber jazýshynyń rýhanı qundylyqtarǵa erekshe mán beretini aıtylǵan.
Kitaptyń taǵy bir ereksheligi – «Áke týraly birer sóz» atty basylymnyń alǵysózi. Ony Kemel Toqaevtyń balasy Qazaqstan Respýblıkasynyń Prezıdenti Qasym-Jomart Toqaevtyń ózi jazǵan.
Óziniń memýarlyq essesinde Qasym-Jomart Toqaev jazýshynyń ómir joly týraly baıandaıdy, onyń týyp-ósken ortasyn sýretteıdi, maıdandaǵy qıyndyqtary týraly áńgimeleıdi. Sondaı-aq Kemel Toqaevtyń jazýshy retinde qalyptasýy jóninde syr shertip, onyń shyǵarmalaryna degen óziniń kózqarasy, shyǵarmashylyq ustanymy men joldastary týraly júrekjardy pikirin bildiredi.
Jınaqqa «Zoloto s tamgoı», «Nochnoı vystrel» jáne «Taınstvennyı sled» povesteri engen. Avtor bul týyndylarynda alypsatarlarmen kúres, arnaıy qyzmetterdiń sheteldik jansyzdarmen qaqtyǵysy, jaýdyń barlaýshylarynyń qylmystaryn ashýdaǵy óte joǵary kásibı deńgeıi, soǵys jyldaryndaǵy qıyn-qystaý kúnderdi óte sheber baıandaıdy.
Bul kitaptyń Qazaqstan men Ázirbaıjan halqy arasyndaǵy mádenı jáne ádebı baılanystyń nyǵaıýyna zor úles qosyp, oqyrmannyń kitapty erekshe qyzyǵýshylyqpen oqıtyny sózsiz.