Atalǵan týyndy alǵash ret 2012 jyly jaryq kórgen, araǵa jyldar salyp ekinshi basylym shyǵyp otyr. Avtor roman-esse stılinde jazylǵan týyndysynda Shámshi Qaldaıaqovtyń jastyq shaǵy, ómirdegi aıtýly sátteri men tulǵalyq qasıeti týraly jazǵan. Sondaı-aq, kitaptyń alǵysózinde jazylǵandaı, shyǵarma bastan-aıaq Shámshiniń óz atynan órbıdi.
«Naýryz meıramymen qatar kelgen búgingi týyndynyń tusaýkeseri qutty bolsyn! Oılamaǵan jerden osy kitaptyń alǵysózin jazý maǵan buıyrypty. Erkinbaı Ákimqulov aǵamyzdy burynnan tanımyn. Bizder jýrnalıs bolsaq eken dep armandap júrgende, Erkinbaı aǵamyzdyń «Lenınshil jas» gazetine maqalalary birinen soń biri shyǵyp jatatyn. Osylaısha aǵalarymyzǵa boı túzep óstik. Keıin taǵdyrdyń jazýymen aǵamyzben tikeleı tanysyp, aralasýdyń sáti tústi. Talaı áńgime-dúken quryp, jaqyn syılastyqta boldyq. Erekeń izdenipmaz jan edi, birnárseni bilgisi keledi de júretin. Basqa týyndylaryn aıtpaǵannyń ózinde, ol kisiniń 2 kitaby kópke úlgi. Biri Ózbekáli Jánibekovke, ekinshisi Shámshi Qaldaıaqovqa arnalǵan. Qazaqtyń osy 2 tulǵasyn erekshe qurmetteımin, - dedi saıasatker, memlekettik qaıratker Qýanysh Sultanov.
Kitaptyń tırajy - 12 myń dana. Oqyrmandar jańa týyndyny elimizdiń oblystyq, qalalyq jáne aýdandyq kitaphanalarynan oqı alady.
«Bul kitaptyń tarıhy erekshe. Atalǵan týyndy alǵash ret 2012 jyly jaryq kórdi. Qoǵamnyń suranysy boıynsha, mine, ekinshi basylymy shyǵyp otyr. Shámshi Qaldaıaqovty bilmeıtin qazaq joq. Ol - kóptegen tanymal ánderdiń avtory ǵana emes, elimizdiń Ánurany avtorlarynyń biri. Erkinbaı aǵamyz Shámshi Qaldaıaqovpen zamandas bolyp, dos, shyǵarmashyl tulǵa retinde jaqyn aralasqan. Bul kitapta týyp-ósken aýylynan bastap, óner shyńyna jetken sátine deıingi kezeń baıandalǵan. Jalpy, Erkinbaı aǵamyz - ózindik jazý stıli bar erekshe jazýshy. Ókinishke qaraı, aǵamyz 2019 jyly baqılyq boldy. Búgin aǵamyzdyń rýhyn eske alyp, kitaptyń tanystyrylymyn uıymdastyryp otyrmyz. Jańa týyndy óz oqyrmanyn tabatynyna senimdimin», - dedi QR Parlamenti Májilisiniń depýtaty Darhan Myńbaı.
Sondaı-aq, aıtýly sharada Erkinbaı Ákimqulovtyń qyzy Quralaı Ákimqulova óz esteligimen bólisti.
«Kitap alǵash ret 2012 jyly shyqty. Sol jyly Qazaqstan Jazýshylar odaǵy týyndyny Memlekettik syılyqqa usyndy. Búgin ekinshi ret basylyp jaryq kórýde. Osy oraıda ıgi iske uıytqy bolǵan QR Parlamentiniń depýtattary men Mádenıet jáne sport mınıstrligine alǵysymdy bildiremin. Meniń ákem Shámshi Qaldaıaqovpen stýdent kezinen jaqyn aralasyp, ómiriniń sońyna deıin dos bolǵan. Biraz jyldar jaqyn aralasqandyqtan, meniń ákem Shámshini tek shyǵarmashyl tulǵa retinde ǵana emes, azamat retinde jaqsy tanydy. Sondyqtan kitabynda qazaqtyń uly kompozıtoryn basqa qyrynan kórsetti desem bolady. Sonymen qatar týyndyda Shámshiden bólek, sol zamanda ónerde júrgen tanymal tulǵalar týraly da estelikter bar. Áli esimde, bala kúnimizde Shámshi Qaldaıaqov bizdiń úıge qonaqqa jıi keletin. Biz «Shámshi aǵa» deıtinbiz. Óte kóńildi kisi edi», - dedi Q. Ákimqulova.
Kitaptyń saltanatty tanystyrylymy elordadaǵy Ulttyq akademıalyq kitaphanada ótti. Oǵan belgili memleket jáne qoǵam qaıratkerleri, Senat, Májilis depýtattary men avtordyń jaqyndary qatysty.