Ál-Farabı atyndaǵy Qazaq ulttyq ýnıversıtetinde árqaısysy 1 060 oryndyq, jalpy 3 180 orynǵa arnalǵan zamanaýı úsh jataqhana qurylysynyń irgetasyn qalaý rásimi ótti.
QazUÝ qalashyǵy qurylysynyń İİ kezeńi aıasynda salynǵaly jatqan jataqhanalar 2024 jyldyń kúzinde aıaqtalady dep josparlanýda, dep habarlaıdy almaty-akshamy.kz.
9 qabatty úsh jataqhananyń jalpy aýdany 49 703,94 sharshy metrdi, al ǵımaratty salýǵa bólingen aýmaq 1,24 gektardy quraıdy. Stýdentter úıiniń ár qabatynda zamanaýı oqý zaldary, demalys oryndary, asqana, kofehana, sportzal, turmystyq bólmeler qarastyrylǵan. 70 sharshy metrlik tolyqqandy jabdyqtalǵan bir bólme 4 adamǵa arnalǵan.
Onyń ishinde úsh jataqhanada ınklúzıvti bilim berý talaptaryn oryndaý maqsatynda múmkindigi shekteýli bilim alýshy jastarǵa arnaıy 132 tósek-oryn qarastyrylǵan.
Saltanatty sharaǵa ýnıversıtet basshylyǵy, QazUÝ ardagerleri, ınvestorlar, BAQ ókilderi, oqý ordasynyń oqytýshy-professorlar quramy men bilim alýshy jastar qatysty.
2022 jyly 1 maýsymda Memleket basshysy Qasym-Jomart Toqaev Ál-Farabı atyndaǵy Qazaq ulttyq ýnıversıtetiniń qyzmetimen tanysyp, QazUÝ qalashyǵy qurylysy İİ kezeńiniń Bas josparyna úlken qoldaý bildirgen bolatyn. Al aǵymdaǵy jyldyń 7 qarasha kúni Memleket basshysy bilim ordasynyń Basqarma Tóraǵasy – Rektory Janseıit Túımebaevty qabyldap, ýnıversıtet qalashyǵyn jańǵyrtý boıynsha birqatar naqty tapsyrmalar berdi.
«Memleket basshysy bilim-ǵylym salasyna erekshe kóńil bólýde. Onyń bir dáleli QazUÝ qalashyǵy qurylysynyń ekinshi kezeńi tikeleı Prezıdent tapsyrmasymen júzege asyrylady. QazUÝ-dyń İİ damý jospary boıynsha qalashyqta jalpy 12 jataqhana, 8 oqý korpýsy boı kóteredi. Bul degenimiz ýnıversıtettegi oqytýshy quram men stýdentterge jaqsy jaǵdaı jasalýyna múmkin beredi. Táýelsizdik kúni qarsańynda bul ýnıversıtetimiz úshin úlken oqıǵa. Qurylys kompanıasy jedel ári qarqyndy túrde jumys jasaımyz dep ýáde berip otyr. Kelesi jyldyń qarasha aıynda jataqhana qoldanylýǵa beriledi dep kútemiz», - dedi bilim ordasynyń Basqarma Tóraǵasy – Rektory Janseıit Túımebaev.
Jańa jyl qarsańynda 4 oqý korpýsy, qańtar aıynda 35 000 sharshy metr emhana qurylysy bastalmaq. Medısınalyq ortalyqta polıklınıka, medısına jáne densaýlyq saqtaý fakúlteti, stomatologıa jumys isteıdi. Buǵan qosa, qyzmetkerlerge arnalǵan turǵynjaı, ınovasıalyq ortalyq, IT hab, sporttyq-saýyqtyrý ortalyǵy t.b ǵımarattar salynady dep josparlanyp otyr.
«Az ýaqyttyń ishinde osy ýnıversıtettiń basshylyǵy tapsyrys berdi. Tórt aıdyń ishinde qurylystyń smetalyq-jobalaryn jasadyq. Jataqhananyń bólmeleri keń, sáýleli, jyly bolady. Joba bekitilgennen keıin qurylys jumystaryn bastadyq. Bir aı boldy bastaǵanymyzǵa. Joba boıynsha on bes aılyq merzimi bar. Toǵyz qabatty, jertólesi bar. Onynshy qabatta tehnıkalyq jaǵy qarastyrylǵan. Qurylys jobasyn boıynsha jańa qurylys materıaldary, zamanaýı dızaınerlik úlgide bekitti. Kelisi jyly jeltoqsan aıynda qurylysty tolyǵymen aıaqtaý nıetimiz bar», -deıdi "Kenzhe Holding" JSHS dırektory Ábdiǵappar Sársenbaev
QazUÝ qalashyǵynyń İİ damý jospary aldaǵy ýaqytta kezeń-kezeńimen júzege asyrylmaq. Bul qurylys jumystary aldaǵy 3 jylǵa josparlanyp otyr. Aldaǵy kúzde QazUÝ 90 jyldyǵyn saltanatty túrde atalyp ótetinin jetkizgen Janseıit Qanseıituly jataqhana qurylysynyń bastalǵanyn resmı jarıalady.
Aıta keteıik qazirgi tańda Ál-Farabı atyndaǵy QazUÝ-da 15 jataqhana bar. Onda oqý ordasynyń 6 myńǵa jýyq stýdenti ornalastyrylǵan. 2026 jylǵa deıin 30 myń stýdentti jataqhanamen qamtamasyz etýdi kózdep otyr.
